ବଲାଙ୍ଗୀର ଅଫିସ, ୩୧।୧୨: ବଲାଙ୍ଗୀର ଜିଲାର ଦେଓଗାଁ ବ୍ଲକ ଖଇରଗୁରା ଓ କୁମୁରିଆରେ ମଙ୍ଗଳବାର କନ୍ଧ ସମେତ ବିଭିନ୍ନ ଆଦିବାସୀ ସମ୍ପ୍ରଦାୟର ପ୍ରସିଦ୍ଧ ଶୁଲିଆ ଯାତ୍ରା ଅନୁଷ୍ଠିତ ହୋଇଛି। ଚଳିତବର୍ଷ ଶୁଲିଆ ଯାତ୍ରା ୩ ଦିନ ଧରି ଅନୁଷ୍ଠିତ ହେବ। ଯାତ୍ରାର ପ୍ରଥମ ଦିନରେ ପଶୁବଳିରେ ଶୁଲିଆ ପୀଠ ରକ୍ତରଞ୍ଜିତ ହୋଇଛି। ଏଥିରେ ସୋମନାଥ ଦେହୁରି ମୁଖ୍ୟ ପୂଜକ ଭାବେ ରହିଥିବାବେଳେ କମିଟି ସଭାପତି ମୟ ପ୍ରଧାନୀ ରହିଛନ୍ତି। ଯାତ୍ରାରେ ସ୍ଥାନୀୟ ବିଧାୟକ ନରସିଂହ ମିଶ୍ର, ଉତ୍କଳ କନ୍ଧ ସମାଜ କେନ୍ଦ୍ରୀୟ କମିଟି ସଭାପତି ଚିନ୍ତାମଣି ଭୋଇ, କଳାହାଣ୍ଡି କନ୍ଧ ସମାଜ ସଭାପତି ପ୍ରକାଶ ମାଝୀ, ବଲାଙ୍ଗୀର ଓ ସୋନପୁର ୧୮ ପ୍ରଗଣାର ସଭାପତିମାନେ ଯୋଗ ଦେଇଥିଲେ। ଏହି ଯାତ୍ରା ମଙ୍ଗଳବାର ସକାଳ ୮ଟାରୁ ଆରମ୍ଭ ହୋଇଛି। ପ୍ରଥମେ ପୂଜାର୍ଚ୍ଚନା ପରେ ପୀଠରେ ପାଟବୁକା (ବୋଦା) ବଳି ପ୍ରଦାନ କରାଯାଇଥିଲା। ଏହାସହ ପକ୍ଷୀ, ପୋଢ଼ ଏବଂ ବୋଦା ବଳିରେ ପୀଠ ରକ୍ତରଞ୍ଜିତ ହୋଇଛି। ଶାନ୍ତିଶୃଙ୍ଖଳା ରକ୍ଷା ପାଇଁ ସେଠାରେ ୧ ପ୍ଲାଟୁନ ପୋଲିସ ମୁତୟନ କରାଯାଇଛି। ଏହି ଅବସରରେ ଦେଓଗାଁ ସ୍ବାସ୍ଥ୍ୟକେନ୍ଦ୍ର ପକ୍ଷରୁ ଏକ ସ୍ବାସ୍ଥ୍ୟ ଶିବିର ଅନୁଷ୍ଠିତ ହୋଇଯାଇଛି। ଯାତ୍ରାରେ ଜିଲା ତଥା ଜିଲା ବାହାରରୁ ହଜାର ହଜାର ଲୋକ ଯୋଗ ଦେଇଥିଲେ।
