ଜଗତ୍ସିଂହପୁର ଅଫିସ,୧୦ା୧୨: ଫାଇନାନ୍ସ କର୍ମଚାରୀଙ୍କ ନିର୍ଯାତନା ଯୋଗୁ ଜଗତ୍ସିଂହପୁର ଥାନା ଅନ୍ତର୍ଗତ ଅଲଣାହାଟ କାଂଶ ଗ୍ରାମର ସୂର୍ଯ୍ୟକାନ୍ତ ଖୁଣ୍ଟିଆ ନାମକ ବ୍ୟକ୍ତିଙ୍କ ରବିବାର ରାତିରେ ମୃତ୍ୟୁ ହୋଇଥିବା ଅଭିଯୋଗ ହୋଇଛି। ସୂର୍ଯ୍ୟକାନ୍ତଙ୍କ ବଡ ଭାଇ ସନ୍ତୋଷଙ୍କ ଅଭିଯୋଗକ୍ରମେ ପୋଲିସ ଦଫା ୩୦୬/୩୪ ଆଇପିସିରେ ମାମଲା ସଂଖ୍ୟା ୪୪୪/୧୯ ରୁଜୁ କରି ତଦନ୍ତ ଚଳାଇଛି।
ସନ୍ତୋଷ ଅଭିଯୋଗରେ ଦର୍ଶାଇଛନ୍ତି, ରବିବାର ରାତି ପ୍ରାୟ ୧ଟାରେ ତାଙ୍କ ଭାଇ ସୂର୍ଯ୍ୟକାନ୍ତ ଶୋଇଥିବା ବେଳେ ବାଡେଇ ପିଟି ହୋଇଥିଲେ। ପାଟିରୁ ଫେଣ ବାହାରିବା ଦେଖି ସେମାନେ ସଙ୍ଗେସଙ୍ଗେ ନିକଟସ୍ଥ ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସୂର୍ଯ୍ୟକାନ୍ତଙ୍କ ମୃତ୍ୟୁ ପଛରେ ଏକ ଫାଇନାନ୍ସ କମ୍ପାନୀ ଓ ଏହାର ଜଣେ ଏଜେଣ୍ଟଙ୍କ ହାତ ରହିଛି। ସୂର୍ଯ୍ୟକାନ୍ତ ଏହି ଫାଇନାନ୍ସ ସଂସ୍ଥା ସହାୟତାରେ ଏକ ଟ୍ରାକ୍ଟର କିଣିଥିଲେ। ପ୍ରତି ମାସ କିସ୍ତି ଟଙ୍କା ଦେଉଥିଲେ। କିନ୍ତୁ ଅସୁବିଧା କାରଣରୁ ୨/୩ ମାସ ହେବ କିସ୍ତି ଟଙ୍କା ଦେବାରେ ବାଧା ଉପୁଜିଥିଲା। ଗତ ୨୮ା୧୧ା୧୯ରେ ଫାଇନାନ୍ସ କମ୍ପାନୀର ୫/୬ ଜଣ କର୍ମଚାରୀ ଓ ଏଜେଣ୍ଟ ତାଙ୍କ ଘରେ ପହଞ୍ଚତ୍ ଧମକ ଦେଇ ଗାଡି ନେବାକୁ ଚେଷ୍ଟା କରିଥିଲେ। ସେ ଯେତେ ନେହୁରା ହେଲେ ମଧ୍ୟ କର୍ମଚାରୀମାନେ କିଛି ନ ଶୁଣି ଟ୍ରାକ୍ଟର ନେଇଯାଇଥିଲେ। ତାର ୨/୩ ଦିନ ପରେ ସୂର୍ଯ୍ୟକାନ୍ତଙ୍କୁ ତାଙ୍କ ଅଫିସକୁ ଡାକି ଧମକଚମକ ଦେଇଥିଲେ। ତାଙ୍କ ଅନୁରୋଧ ମଧ୍ୟ ରକ୍ଷା କରି ନ ଥିଲେ। ଏପରି କି ତାଙ୍କୁ ଧମକ ଦେଇଥିଲେ ବୋଲି ସନ୍ତୋଷ ଅଭିଯୋଗରେ ଦର୍ଶାଇଛନ୍ତି। ସେମାନେ ଏକଥା କହିଥିଲେ ଯେ, ୩ଟା କିସ୍ତି ଟଙ୍କା ଦେବା ସହ ଅଗ୍ରୀମ ୪ର୍ଥ କିସ୍ତି ଦେବାକୁ ପଡିବ। ଏଥିରେ ସେ ନିରାଶ ହୋଇ ଫେରିଥିବା ବେଳେ ରବିବାର ସନ୍ଧ୍ୟାରେ ସେମାନେ ପୁଣି ତାଙ୍କ ଘରେ ପହଞ୍ଚତ୍ଥିଲେ। ସୂର୍ଯ୍ୟକାନ୍ତଙ୍କ ସହ କଥା ହେବେ ବୋଲି କହି ଘରୁ ଡାକି ନେଇଥିଲେ। ରାତି ୧୧ଟାରେ ପୁଣି ଘରେ ଆଣି ଛାଡି ଦେଇଥିଲେ। ଏହାପରେ ସେ ସୂର୍ଯ୍ୟକାନ୍ତଙ୍କୁ କ’ଣ ହେଲା ପଚାରିବାରୁ କିଛି ଉତ୍ତର ମିଳି ନ ଥିଲା। ବରଂ ସୂର୍ଯ୍ୟକାନ୍ତ କାନ୍ଦି କାନ୍ଦି ନ ଖାଇ ଭୋକରେ ଶୋଇ ପଡିଥିଲେ।
