ଯୋଡ଼ା, ୨୯।୪ (ଡି.ଏନ.ଏ.): କେନ୍ଦୁଝର ଜିଲା ଯୋଡା ଖଣିମଣ୍ଡଳର ବଡବିଲସ୍ଥିତ ଆରିୟା ଷ୍ଟିଲ କାରଖାନାରୁ ପରିବହନ ବେଳେ ପିଲେଟ ଚୋରି କରିଥିବା ଦୁଇ ଫେରାର ଅଭିଯୁକ୍ତଙ୍କୁ ପୋଲିସ ବୁଧବାର ଗିରଫ କରି କୋର୍ଟଚାଲାଣ କରିଛି। ଗିରଫ ଅଭିଯୁକ୍ତଦ୍ୱୟ ହେଲେ କମାର ଯୋଡା ଅଞ୍ଚଳର ସମୀର ଖାନ୍ ଓରଫ ପପୁ ଓ ଅମିର ହୁସେନ୍ ଓରଫ ରାଜ୍। ଆରିୟା ଷ୍ଟିଲ କମ୍ପାନୀରେ କାର୍ଯ୍ୟ କରୁଥିବା ସୁରକ୍ଷା କର୍ମୀ, ଅଧିକାରୀ ଓ ସ୍ଥାନୀୟ କେତେକ ଯୁବକଙ୍କ ସହ ମିଶି ଉକ୍ତ କମ୍ପାନୀରୁ ଡମ୍ପର ଯୋଗେ ବୋଝେଇ ହୋଇ ଆସୁଥିବା ପ୍ରାୟ ୬୩. ୧୫୦ ମେଟ୍ରିକ ଟନ୍ ପିଲେଟ୍କୁ ଗନ୍ତବ୍ୟସ୍ଥଳ ବାଂଶପାଣି ରେଳ ସାଇଡିଂରେ ପକାଇବା ପରିବର୍ତ୍ତେ ଚଞ୍ଚକତା କରି ଚୋରାଚାଲାଣ କରିବାକୁ ଉଦ୍ୟମ କରିଥିଲେ। ଏନେଇ ଯୋଡା ଥାନାରେ କମ୍ପାନୀ ପକ୍ଷରୁ ଲିଖିତ ଅଭିଯୋଗ ହେବା ପରେ ପୋଲିସ ଏକ ମାମଲା (ନଂ.୯୨/ ୨୦) ରୁଜୁ କରି ଏଥିରେ ସମ୍ପୃକ୍ତ ଥିବା ୭ଜଣଙ୍କ ମଧ୍ୟରୁ ୪ଜଣ କମ୍ପାନୀରେ କାର୍ଯ୍ୟରତ ଥିବା ଅଧିକାରୀ ଓ ସୁରକ୍ଷା କର୍ମୀଙ୍କୁ ଗିରଫ କରି କୋର୍ଟଚାଲାଣ କରିଥିଲା। ଅନ୍ୟ ୩ ଅଭିଯୁକ୍ତ ଦୀର୍ଘବର୍ଷ ହେଲା ପୋଲିସକୁ ଧୂଳି ଦେଇ ଫେରାର ଥିଲେ। ପୋଲିସ ଖବରପାଇ ଚଢାଉ କରି ଫେରାର ଥିବା ୩ ଜଣଙ୍କ ମଧ୍ୟରୁ ୨ଜଣଙ୍କୁ ଗିରଫ କରିଛି।
