ପାଟନା,୨୮।୩: ବିହାର ମୁଖ୍ୟମନ୍ତ୍ରୀ ନୀତୀଶ କୁମାର କହିଛନ୍ତି, ଫେଲ୍ ମାରିବ ପ୍ରଧାନମନ୍ତ୍ରୀ ମୋଦିଙ୍କ ଲକ୍ଡାଉନ୍। ତେବେ କରୋନା ସଂକ୍ରମଣକୁ ଦୃଷ୍ଟିରେ ରଖି ସାରା ଦେଶରେ ଲକ୍ଡାଉନ୍ ଘୋଷଣା କରାଯାଇଥିବା ବେଳେ ଏବେ ଶ୍ରମିକମାନେ ବିଭିନ୍ନ ରାଜ୍ୟରୁ ଘରମୁହାଁ ହୋଇଛନ୍ତି। ବିଶେଷ କରି ଦିଲ୍ଲୀ ଓ ଉତ୍ତରପ୍ରଦେଶରେ ଥିବା ଶ୍ରମିକମାନେ ଯେ କୌଣସି ଉପାୟରେ ଘରେ ପହଞ୍ଚିବାକୁ ଚେଷ୍ଟା କରୁଥିବା ଦେଖାଯାଇଛି। ଏହି ସମୟରେ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏହି ଶ୍ରମିକମାନଙ୍କୁ ଘରେ ପହଞ୍ଚାଇବା ପାଇଁ ବସ୍ର ବ୍ୟବସ୍ଥା କରିଛନ୍ତି। ଏହାକୁ ଦେଖିବା ପରେ ନୀତୀଶ କହିଛନ୍ତି ଯଦି ବସ୍ ମାଧ୍ୟମରେ ଲୋକଙ୍କୁ ପରିବାହନ କରାଯାଏ ତେବେ ମୋଦିଙ୍କ ଲକ୍ଡାଉନ୍ ଫେଲ୍ ମାରିବା ସହ ଏହା କରୋନା ସଂକ୍ରମଣକୁ ବୃଦ୍ଧି କରିବାର ଆଶଙ୍କା ମଧ୍ୟ ରହିଛି। ତେଣୁ ଶ୍ରମିକମାନେ ଯିଏ ଯେଉଁଠି ଅଛନ୍ତି ସେହିଠାରେ ରୁହନ୍ତୁ ଓ ସେଠାକାର ସରକାର ସେମାନଙ୍କର ସମସ୍ତ ଦାୟିତ୍ୱ ନିଅନ୍ତୁ ବୋଲି ନୀତୀଶ କହିଛନ୍ତି।
