ନ୍ୟୁୟର୍କ,୩୦।୫(ପି.ଟି.): ଜଣାଶୁଣା ପତ୍ରିକା ଫୋର୍ବସ ବିଶ୍ୱର ସର୍ବାଧିକ ଆୟକାରୀ ଆଥଲେଟ ତାଲିକା ପ୍ରକାଶିତ କରିଛି। ଏଥିରେ ଏକମାତ୍ର ଭାରତୀୟ କ୍ରିକେଟର ଭାବେ ସ୍ଥାନ ପାଇଛନ୍ତି ଭାରତୀୟ କ୍ରିକେଟ ସୁପରଷ୍ଟାର ବିରାଟ କୋହଲି। ୨୦୨୦ ତାଲିକାରେ ସେ ୨୬ ମିଲିୟନ ଆମେରିକୀୟ ଡଲାର ଆୟ ସହ ୧୦୦ରୁ ୬୬ତମ ସ୍ଥାନକୁ ଲମ୍ବ ଡିଆଁ ମାରିଛନ୍ତି। ପୁଣି ଏକମାତ୍ର କ୍ରିକେଟର ଭାବେ ୩୧ ବର୍ଷୀୟ କୋହଲି ଶ୍ରେଷ୍ଠ-୧୦୦ରେ ସ୍ଥାନ ପାଇଛନ୍ତି। ବିଜ୍ଞାପନରୁ ସେ ୨୪ ଓ ପାଉଣା କିମ୍ବା ପୁରସ୍କାର ରାଶି ହିସାବରେ ସେ ୨ ମିଲିୟନ ଆମେରିକୀୟ ଡଲାର ଉପାର୍ଜନ କରିଛନ୍ତି। ୨୫ ମିଲିୟନ ଡଲାର ଉପାର୍ଜନ କରି ସେ ୨୦୧୯ ତାଲିକାର ୧୦୦ତମ ସ୍ଥାନରେ ଥିଲେ। ସେହିପରି ୨୦୧୮ରେ ୨୪ ମିଲିୟନ ଡଲାର ଉପାର୍ଜନ କରି ତାଲିକାର ୮୩ତମ ସ୍ଥାନରେ ଥିଲେ। ଟେନିସ ଲଜେଣ୍ଡ ରୋଜର ଫେଡରର ୧୦୬.୩ ମିଲିୟନ ଅର୍ଥ ଉପାର୍ଜନ କରି ତାଲିକାର ଶୀର୍ଷରେ ରହିଛନ୍ତି। ଗତବର୍ଷ ସେ ପଞ୍ଚମ ସ୍ଥାନରେ ଥିଲେ। ଏବର୍ଷ କୋଭିଡ୍-୧୯ ମହାମାରୀ କାରଣରୁ ସାରା ବିଶ୍ୱରେ କ୍ରୀଡ଼ା ସସ୍ପେଣ୍ଡ ହୋଇଛି ଓ ଆଥଲେଟମାନଙ୍କ ଉପାର୍ଜନ ସାଂଘାତିକ ଭାବେ ପ୍ରଭାବିତ ହୋଇଛି।
