ଦାରିଙ୍ଗବାଡ଼ି,୮।୬(ଡି.ଏନ୍.ଏ): କନ୍ଧମାଳ ଜିଲା ଦାରିଙ୍ଗବାଡ଼ି ଅଞ୍ଚଳରେ କାର୍ଯ୍ୟ କରୁଥିବା ନିୟନ୍ତ୍ରିତ ବଜାର କମିଟି (ରାଇକିଆ) ପକ୍ଷରୁ ଅଞ୍ଚଳରେ ଚଞ୍ଚକତା କରାଯାଉଥିବା ଶନିବାର ସ୍ଥାନୀୟ ବ୍ୟବସାୟୀ ଅଭିଯୋଗ କରିଛନ୍ତି । ବଜାର କମିଟି ପକ୍ଷରୁ ହଳଦୀ, ଚାଉଳ ଆଦି ଟ୍ରକ ଏବଂ ଗୋଦାମରୁ ମାର୍କେଟିଂ (ରାଜସ୍ବ) ଆଦାୟ କରାଯାଉଛି । ମାତ୍ର ଜିଲା ବାହାରୁ ଦାରିଙ୍ଗବାଡ଼ିକୁ ଆସୁଥିବା କିଛି ଟ୍ରକରୁ ରାଜସ୍ବ ଆଦାୟ ବଦଳରେ ତାଙ୍କଠାରୁ କିଛି ଉତ୍କଚ ନେଇ ଛାଡ଼ିଦିଆଯାଉଥିବା ଅଭିଯୋଗରେ ଦର୍ଶାଯାଇଛି।
ଶୁକ୍ରବାର ବୌଦ୍ଧ ଜିଲାରୁ ଏକ ୧୫ଟନ୍ ଚାଉଳ ବୋଝେଇ ଟ୍ରକ ସମେତ ଏକ ମିନି ଟ୍ରକ ସୋରଡ଼ାରୁ ଆସିଥିବା ୪ଟନ୍ ଚାଉଳର ରାଜସ୍ବ ଆଦାୟ ନ କରି ତାଙ୍କଠାରୁ ଚଞ୍ଚକତା କରି କିଛି ଉତ୍କଚ ନେଇ ଜଣେ କର୍ମଚାରୀ ଛାଡ଼ିଦେଇଥିବା ସ୍ଥାନୀୟ ବ୍ୟବସାୟୀ କହିଛନ୍ତିା ଏଭଳି ହେଲେ ଦାରିଙ୍ଗବାଡ଼ି ବ୍ୟବସାୟୀମାନେ ବଜାର ନିୟନ୍ତ୍ରଣ କମିଟିର ଅଧ୍ୟକ୍ଷଙ୍କୁ ଜଣାଇବୁ ବୋଲି ସେମାନେ କହିଛନ୍ତି ।
ଏ ନେଇ ଦାରିଙ୍ଗବାଡ଼ି ନିୟନ୍ତ୍ରିତ ବଜାର କମିଟି ପକ୍ଷରୁ କରାଯାଇଥିବା ଭେଣ୍ଡି ଜୋନର ଦାୟିତ୍ୱରେ ରହିଥିବା ଅଧିକାରୀ ରମେଶ ଚନ୍ଦ୍ର ସ୍ବାଇଁ କହିଛନ୍ତିଯେ, ବୌଦ୍ଧ ଜିଲାରୁ ଯେଉଁ ଚାଉଳ ବୋଝେଇ ଟ୍ରକ ଶୁକ୍ରବାର ଆସିଥିଲା ସେମାନେ ଧାନ କିଣା ବେଳେ ସେଠାରେ ରାଜସ୍ବ ପ୍ରଦାନ କରିଥିଲେ ତେବେ ସେମାନେ କୌଣସି ରସିଦ ଦେଖେଇ ନ ଥିଲେ ମଧ୍ୟ ଆସନ୍ତା ଦିନରେ ରସିଦ ଦେଖେଇବା ପାଇଁ କୁହାଯାଇ ଛଡ଼ାଯାଇଥିବା କହିଛନ୍ତି । ଏଥି ସହ ସୋରଡ଼ା ଅଞ୍ଚଳରୁ କୌଣସି ଚାଉଳ ଟ୍ରକ ଆସିଥିବା ତାଙ୍କ ନଜରକୁ ଆସି ନ ଥିବା କହିଛନ୍ତି । ଏ ନେଇ ନିୟନ୍ତ୍ରିତ ବଜାର କମିଟିର ସମ୍ପାଦକ ସୁରେଶ ଚନ୍ଦ୍ର ବେହେରାଙ୍କ ସହ ଯୋଗାଯୋଗ କରାଯିବାରୁ ସେ ବୌଦ୍ଧ ଜିଲାରୁ ଟ୍ରକରେ ଚାଉଳ ଆସିଥିବା ଖବର ରହିଥିବା ସ୍ବୀକାର କରିବା ସହ ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ।
