କପ୍ତିପଦା,୨୬ା୮(ଡି.ଏନ୍.ଏ.)- ‘ମିଶନ ତାଳ’ର ଉଦ୍ଘାଟନୀ ଉତ୍ସବ ଶୁକ୍ରବାର ଅନୁଷ୍ଠିତ ହୋଇଯାଇଛି। ରାଜ୍ୟ ପୁରସ୍କୃତ ଶିକ୍ଷକ ସନ୍ତୋଷ କୁମାର ସାହୁଙ୍କ ଆବାହକତ୍ୱରେ ଅନୁଷ୍ଠିତ ଉତ୍ସବରେ ମୟୂରଭଞ୍ଜ ଜିଲା କପ୍ତିପଦା ମଣ୍ଡଳ ଶିକ୍ଷାଧିକାରୀ ଶଶୀଧର ସିଂହ ମୁଖ୍ୟ ଅତିଥିଭାବେ ଯୋଗଦେଇ ଏହାକୁ ଆନୁଷ୍ଠାନିକ ଭାବେ ଉଦ୍ଘାଟନ କରିଥିଲେ।
ଆଗରୁ ସବୁ ଗାଁରେ ଅନେକ ତାଳଗଛ ଥିଲା। ଏବେ ଏହି ଗଛ ଆଉ ଦେଖିବାକୁ ମିଳୁ ନାହିଁ ା ଏହା ବଜ୍ରପାତରୁ ସମସ୍ତଙ୍କୁ ସୁରକ୍ଷା ଦେଉଥିଲା। ସମ୍ପ୍ରତି ବିଶ୍ୱ ତାପନ ସମସ୍ୟା ଯୋଗୁ ବଜ୍ରପାତ ଜନିତ ଦୁର୍ଘଟଣା ବଢିବାରେ ଲାଗିଛି ା ଆଗକୁ ଏହାର ପ୍ରଭାବ ଅଧିକ ରହିବ ବୋଲି ପରିବେଶବିତମାନେ ମତ ଦେଉଛନ୍ତି ା ଯଦି ବିଭିନ୍ନ ଅଞ୍ଚଳରେ ତାଳଗଛ ରୋପଣ କରାଯିବ, ତେବେ ପ୍ରାକୃତିକ ଉପାୟରେ ବଜ୍ରପାତ ବିପତ୍ତିରୁ ରକ୍ଷା ପାଇ ହେବ ବୋଲି ଉତ୍ସବରେ ବକ୍ତା ଓ ଅତିଥି କହିଥିଲେ। ତାଳ ଗଛର ଅନେକ ଉପକାରୀ ଗୁଣ ରହିଛି। ତାଳୁରୁ ତଳିପା ଯାଏ ଏହି ଗଛ ଚାଷୀଙ୍କ ଉପକାରରେ ଲାଗେ । ବୈଜ୍ଞାନିକ ଦୃଷ୍ଟିକୋଣ ଅନୁଯାୟୀ ତାଳଗଛ ବିଜୁଳିକୁ ଆକର୍ଷିତ କରି ମୃତ୍ତିକାକୁ ଛାଡ଼ିଥାଏ। ଏହା ଦ୍ୱାରା ବଜ୍ରପାତଠାରୁ ପ୍ରାଣୀକୁଳ ସୁରକ୍ଷା ପାଆନ୍ତି। ଏହାଦ୍ୱାରା ପରିବେଶ ମଧ୍ୟ ସନ୍ତୁଳିତ ରହେ। ଏଣୁ ବିଭିନ୍ନ ଅଞ୍ଚଳରେ ତାଳଗଛ ଚାରା ରୋପଣ ଉପରେ ସଭାରେ ଗୁରୁତ୍ୱାରୋପ କରାଯାଇଥିଲା। ଏହି ଅବସରରେ କପ୍ତିପଦା ବ୍ଲକ୍ର ବିଭିନ୍ନ ବିଦ୍ୟାଳୟର ଛାତ୍ରୀଛାତ୍ରଙ୍କ ଜରିଆରେ ଚାରା ରୋପଣ ଲାଗି ରଖାଯାଇଥିବା ଲକ୍ଷ୍ୟ ସମ୍ପର୍କରେ ଶିକ୍ଷାଧିକାରୀ ସୂଚନା ଦେବା ସହ ତାଳଗଛର ଉପକାରିତା ସମ୍ପର୍କରେ ଅଧିକ ଆଲୋଚନା କରିବାକୁ ପରାମର୍ଶ ଦେଇଥିଲେ। ଏଥିସହ ତାଳ ମିଶନକୁ ଅଧିକ ପ୍ରସାରିତ କରିବା ପାଇଁ ପ୍ରୋତ୍ସାହନର ବ୍ୟବସ୍ଥା କରାଯିବ ବୋଲି ସଭାରେ ସୂଚନା ଦିଆଯାଇଥିଲା।
