ଲକ୍ଷ୍ନୌ,୧।୬: ଉତ୍ତର ପ୍ରଦେଶର ବନଓ୍ବାରି ତୋଲା ଗାଁରେ ଥିବା ନେହା ଓ ଜ୍ୟୋତି ନାମକ ଦୁଇ ଭଉଣୀ ଏବେ ସୋସିଆଲ ମିଡିଆରେ ବେଶ୍ ଚର୍ଚ୍ଚିତ। ଦିନେ ପିତାଙ୍କର ଅସୁସ୍ଥତା ପାଇଁ ଘରୁ ଗୋଡ କାଢିଥିବା ଏହି ଦୁଇ ଭଉଣୀ କିଛି ସାଧାରଣ କାମ ହାତକୁ ନେଇ ନ ଥିଲେ। ଏମାନେ ପିତାଙ୍କ ବ୍ୟବସାୟ ସମ୍ଭାଳିବାକୁ ଯାଇ ଏକ ସେଲୁନ୍ ଆରମ୍ଭ କରିଥିଲେ। ଯେଉଁଠି ଏମାନେ ପୁରୁଷମାନଙ୍କର ଦାଢି କାଟୁଥିଲେ। ପ୍ରଥମେ ପ୍ରଥମେ ଏମାନେ ସମାଲୋଚନାର ଶିକାର ହୋଇଥିଲେ ମଧ୍ୟ ଏବେ ଏମାନେ ଆସିଛନ୍ତି ଚର୍ଚ୍ଚାକୁ। ଏମିତି ଏକ ଖବର ସାମ୍ନାକୁ ଆସିବା ପରେ ଭାରତୀୟ କ୍ରିକେଟର ଭଗବାନ କୁହାଯାଉଥିବା ସଚ୍ଚିନ ତେନ୍ଦୁଲକର ଜ୍ୟୋତି ଓ ନେହାଙ୍କ ସେଲୁନରେ ଆସି ଦାଢି କାଟିଥିଲେ। ଏହାପରେ ସଚ୍ଚିନ ଏହାକୁ ନେଇ ସୋସିଆଲ ମିଡିଆ ଇନଷ୍ଟାଗ୍ରାମରେ ପୋଷ୍ଟ କରିବା ସହ ଦୁଇ ଭଉଣୀଙ୍କର ବେଶ୍ ପ୍ରଶଂସା କରିଥିଲେ। ଏହାପରେ ଜ୍ୟୋତି ଓ ନେହାଙ୍କର ଏକ ଭିଡିଓ ୟୁଟ୍ୟୁବରେ ଭାଇରାଲ ମଧ୍ୟ ହୋଇଥିଲା। ଏବେ ଏମାନଙ୍କ ପାଖରେ ବଲିଉଡ୍ର କେତେଜଣ ନାମୀ କଳାକାର ମଧ୍ୟ ଦାଢି କାଟିଥିବା କୁହାଯାଉଛି। ପିତାଙ୍କ ସଂସାର ବୋଝକୁ ମୁଣ୍ଡରେ ନେଇ ବାହାରକୁ ଗୋଡ କାଢିଥିବା ଜ୍ୟୋତି ଓ ନେହାଙ୍କ ଭାଗ୍ୟରେ ଏବେ ପରିବର୍ତ୍ତନ ଆସିଛି ବୋଲି କୁହାଯାଉଛି।
