ଅନୁଗୋଳ ଅଫିସ, ୧୦।୯
ଅନୁଗୋଳ ଜିଲା ନାଲ୍କୋ ଥାନା ବଳରାମପ୍ରସାଦରେ ବଧୂହତ୍ୟା ଅଭିଯୋଗ ହୋଇଛି। ସୌମ୍ୟାଶ୍ୱେତା ବାରିକ(୨୩)ଙ୍କୁ ହତ୍ୟା କରାଯାଇଥିବା ତାଙ୍କ ବାପା ବାନାମ୍ବର ବାରିକ ସୋମବାର ଅଭିଯୋଗ କରିବା ପରେ ନାଲ୍କୋ ପୋଲିସ ନଂ. ୧୩୨/୧୯ରେ ମାମଲା ରୁଜୁ କରିଛି। ଏଥିସହ ମହିଳାଙ୍କ ସ୍ବାମୀ ସତ୍ୟାନନ୍ଦ ବାରିକ ଓ ଶ୍ୱଶୁର ଗୋକୁଳଚନ୍ଦ୍ର ବାରିକଙ୍କୁ ଥାନାରେ ଅଟକ ରଖି ପଚରା ଉଚରା କରୁଛି। ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ବୋଲି ଥାନା ଅଧିକାରୀ ଗୀତାଞ୍ଜଳି ସାହୁ ସୂଚନା ଦେଇଛନ୍ତି।
ବାନାମ୍ବର ଅଭିଯୋଗ କରିଛନ୍ତି ଯେ, ନିଶା ଥାନା କଙ୍କରେଇ ଅଞ୍ଚଳର ସୌମ୍ୟାଶ୍ୱେତା ୨୦୧୬ ଏପ୍ରିଲ ୨୬ରେ ବଳରାମପ୍ରସାଦର ସତ୍ୟାନନ୍ଦଙ୍କୁ ବିବାହ କରିଥିଲେ। ତାଙ୍କର ଗୋଟିଏ ଦୁଇ ବର୍ଷର ଶିଶୁ କନ୍ୟା ରହିଛି। ସତ୍ୟାନନ୍ଦ ପ୍ରତିଦିନ ମଦ୍ୟପାନ କରୁଥିବା ବେଳେ ତାଙ୍କ ଝିଅଙ୍କୁ ମାନସିକ ଓ ଶାରୀରିକ ନିର୍ଯାତନା ଦିଆଯାଉଥିଲା। ବିବାହ ସମୟରେ ଏକ ୪ ଚକିଆ ଗାଡ଼ି ଦିଆଯାଇଥିଲେ ବି ୨ଲକ୍ଷ ଟଙ୍କାର ଆଉ ଏକ ଗାଡି ଆଣିବାକୁ ଦାବି କରାଯାଉଥିଲା। ଗାଡ଼ି ପାଇଁ ଟଙ୍କା ନ ଦେବାରୁ ଝିଅକୁ ମାରିଦିଆଯାଇଥିବା ସେ ଅଭିଯୋଗରେ ଦର୍ଶାଇଛନ୍ତି। ସତ୍ୟାନନ୍ଦଙ୍କ ସହ ତାଙ୍କ ବାପା, ମା, ଭଉଣୀ ଓ ଭିଣୋଇ ଏଥିରେ ସମ୍ପୃକ୍ତ ଥିବା ବାନାମ୍ବର ଅଭିଯୋଗ କରିଛନ୍ତି। ଅନ୍ୟପକ୍ଷରେ ଅଭିଯୋଗକୁ ସୌମ୍ୟାଶ୍ୱେତାଙ୍କ ଶ୍ୱଶୁର ଗୋକୁଳାନନ୍ଦ ଖଣ୍ଡନ କରିଛନ୍ତି। ସେ କହିଛନ୍ତି, ବୋହୂ ସୌମ୍ୟାଶ୍ୱେତାଙ୍କୁ କେହି ହତ୍ୟା କରିନାହାନ୍ତି। ରାତିରେ ସମସ୍ତେ ଶୋଇଥିବା ବେଳେ କ’ଣ ହୋଇଛି ଆମେ ଜାଣିନୁ। ସୌମ୍ୟାଶ୍ୱେତାଙ୍କୁ କୌଣସି ଯୌତୁକ ନିର୍ଯାତନା ଦିଆଯାଇ ନ ଥିବା ସେ କହିଛନ୍ତି। ନାଲ୍କୋ ଥାନା ଅଧିକାରୀ କହିଛନ୍ତି, ପଞ୍ଚନାମାବେଳେ ମୃତଦେହ ବେକରେ ଦାଗ ଥିଲା। ଅନ୍ୟ କୌଣସି ସ୍ଥାନରେ ସେପରି କିଛି ଚିହ୍ନ ନ ଥିଲା। ସ୍ବାମୀ ଓ ଶ୍ୱଶୁରଙ୍କୁ ଅଟକ ରଖାଯାଇ ପଚରା ଉଚରା ଜାରି ରହିଛି।
