ପୁରୀ ଅଫିସ, ୨୫ା୭: ବିପର୍ଯ୍ୟସ୍ତ ହୋଇପଡ଼ିିଛି ଶ୍ରୀକ୍ଷେତ୍ରର ଏକାଧିକ ଐତିହ୍ୟ ପୁଷ୍କରିଣୀ। ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ଗୋଟିଏ ପରେ ଗୋଟିଏ ପୁଷ୍କରିଣୀର ସ୍ଥିତି ସଙ୍ଗିନ ହେବାରେ ଲାଗିଛି। ସବୁଠୁ ପରିତାପର ବିଷୟ ହେଉଛି ଶ୍ରୀକ୍ଷେତ୍ରର ପଞ୍ଚତୀର୍ଥ ମଧ୍ୟରୁ ଅନ୍ୟତମ ଇନ୍ଦ୍ରଦ୍ୟୁମ୍ନ ଅବସ୍ଥା ଅଧିକ ଦୟନୀୟ ହୋଇପଡ଼ିଛି। ତିନି ପାର୍ଶ୍ୱରେ ପାଚେରି ଭୁଶୁଡି ଏହା ଅସୁନ୍ଦର ଲାଗୁଥିବାବେଳେ ଏଥିରେ ରାସ୍ତାରୁ ବୋହି ଆସୁଥିବା ମଇଳା ପାଣି ପଶୁଛି। ଭାଙ୍ଗି ଯାଇଥିବା ପାଚେରି ତିଆରି ହୋଇ ନ ଥିବାବେଳେ ଅସ୍ଥାୟୀ ଭାବେ ବାଲିବସ୍ତା ଓ ସିମେଣ୍ଟ କାନ୍ଥ ବାଡ଼ା କରାଯାଇଛି। ଗୁରୁବାର ହୋଇଥିବା ବର୍ଷାରେ ପୂର୍ବପାର୍ଶ୍ୱ ରାସ୍ତା ଦବିଯାଇ ମଇଳା ପାଣି ପବିତ୍ର ଇନ୍ଦ୍ରଦ୍ୟୁମ୍ନରେ ପଶୁଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। କେବଳ ଇନ୍ଦ୍ରଦ୍ୟୁମ୍ନରେ ଏହି ମଇଳା ପାଣି ପଶୁଛି ତାହା ନୁହେଁ ଦବି ଯାଇଥିବା ସ୍ଥାନ ଖାଇଯାଉଥିବାରୁ ନିକଟସ୍ଥ ଘର ପ୍ରତି ମଧ୍ୟ ବିପଦ ସୃଷ୍ଟି କରିଛି। ଏଥିସହ ସେହି ରାସ୍ତା ଦେଇ ଯା’ଆସ କରୁଥିବା ଗାଡ଼ି ଦୁର୍ଘଟଣାଗ୍ରସ୍ତ ହେବାର ଆଶଙ୍କା ମଧ୍ୟ ସୃଷ୍ଟି ହୋଇଛି।
ଶ୍ରୀକ୍ଷେତ୍ରର ପଞ୍ଚତୀର୍ଥ ମଧ୍ୟରୁ ଅନ୍ୟତମ ତୀର୍ଥ ହେଉଛି ଇନ୍ଦ୍ରଦ୍ୟୁମ୍ନ। ହିନ୍ଦୁଧର୍ମାଲମ୍ବୀମାନେ ପବିତ୍ର ପଞ୍ଚତୀର୍ଥରେ ବୁଡ଼ ପକାଇଲେ ପୁରୀକୁ କରିଥିବା ତୀର୍ଥଯାତ୍ରା ସଫଳ ହୁଏ ବୋଲି ବିଶ୍ୱାସ ରହିଛି। ତେବେ ତୀର୍ଥଯାତ୍ରୀଙ୍କ ଭାବାବେଗ ସହ ଜଡ଼ିତ ଇନ୍ଦ୍ରଦ୍ୟୁମ୍ନ ପୁଷ୍କରିଣୀର ଉପଯୁକ୍ତ ରକ୍ଷଣାବେକ୍ଷଣ କରାଯାଉନାହିଁ। ବିପଦପୂର୍ଣ୍ଣ ହୋଇପଡ଼ିଛି ପାଚେରି, ପ୍ରଦୂଷିତ ହୋଇଛି ଏହାର ପାଣି। ଗତବର୍ଷ ଅଗଷ୍ଟ ୬ରେ ଏହାର ପୂର୍ବ ପାର୍ଶ୍ୱ ପାଚେରି ପ୍ରାୟ ୫୬ ଫୁଟ ଏବଂ ଦକ୍ଷିଣ ପାର୍ଶ୍ୱରେ ପ୍ରାୟ ୫୦ ଫୁଟରୁ ଊର୍ଦ୍ଧ୍ୱ ପାଚେରି ଭୁଶୁଡ଼ି ପଡ଼ିିଥିଲା। ସେହିପରି ଗତବର୍ଷ ଅକ୍ଟୋବର ୧୧ତାରିଖ ରାତିରେ ହୋଇଥିବା ବର୍ଷାରେ ଉତ୍ତର ପାର୍ଶ୍ୱ ପାଚେରି ପ୍ରାୟ ୪୦ରୁ ୫୦ ଫୁଟ ପୁଷ୍କରିଣୀ ମଧ୍ୟକୁ ଭୁଶୁଡି ପଡ଼ିିଥିଲା। ପ୍ରାୟ ବର୍ଷେ ହେବ ପାଚେରି ତିଆରି କରାଯାଉନାହିଁ। ପୂର୍ବ ପାର୍ଶ୍ୱରେ ଭାଙ୍ଗିଥିବା ପାଚେରି କଡ଼ରେ ଶ୍ରୀମନ୍ଦିର ପ୍ରଶାସନ ସିମେଣ୍ଟ କାନ୍ଥବାଡ଼ା ତିଆରି କରିଥିବାବେଳେ ଉତ୍ତର ପାର୍ଶ୍ୱରେ ଇଟା ଯୋଡ଼େଇ କାନ୍ଥ କରିଛି। ଏହା ପାଚେରିଠାରୁ ପଛକୁ କରାଯାଇଛି ଏବଂ ଆଗରେ ବାଲିବସ୍ତା ପ୍ୟାକ୍ ଦିଆଯାଇଛି, ଯାହାକି ଇନ୍ଦ୍ରଦ୍ୟୁମ୍ନ ପୁଷ୍କରିଣୀର ସୌନ୍ଦର୍ଯ୍ୟକୁ ନଷ୍ଟ କରୁଛି। ବାଲିବସ୍ତା ମଧ୍ୟରୁ ଅଧିକାଂଶ ଫାଟିଗଲାଣି। ସେହିପରି ପୂର୍ବପଟେ ରାସ୍ତା ତଳେ ଯାଇଥିବା ସ୍ବେରେଜ ବୋର୍ଡ ନଳାର ଗୋଟିଏ ଜଏଣ୍ଟ ସ୍ଥାନ ଫାଟିଯିବାରୁ ଏଠାରୁ ମଇଳା ପାଣି ବାହାରି ବାଲିବସ୍ତା ଉପରଦେଇ ଇନ୍ଦ୍ରଦ୍ୟୁମ୍ନ ପୁଷ୍କରିଣୀରେ ମିଶୁଥିଲା। ଏ ନେଇ ଅଞ୍ଚଳବାସୀ ବାରମ୍ବାର ଅଭିଯୋଗ କରିବା ପରେ କିଛିଦିନ ତଳେ ସ୍ବେରେଜ ବୋର୍ଡ ପକ୍ଷରୁ ଏହାର ମରାମତି କରାଯାଇଥିଲା। ରାସ୍ତା ଖୋଳି ଓ ପୁଷ୍କରିଣୀ କଡ଼ରେ ପଡିଥିବା ବାଲିବସ୍ତା ଉଠାଇ ମରାମତି କରାଗଲା, କିନ୍ତୁ ରାସ୍ତାର ସ୍ଥାୟୀ ମରାମତି ନ କରି କେବଳ ବାଲି ପକାଇ ଛାଡ଼ିଦିଆଗଲା। ସ୍ଥାନୀୟ ବାସିନ୍ଦା ବିଭୂତି ଭୂଷଣ ରଥ କହିଛନ୍ତି, ଗୁରୁବାର ବର୍ଷା ଯୋଗୁ ଏହି ସ୍ଥାନରେ ରାସ୍ତା ଦବିଯାଇ ଇନ୍ଦ୍ରଦ୍ୟୁମ୍ନ ପୁଷ୍କରିଣୀକୁ ଘଳିଆ ପଡ଼ିଥିଲା। ଫଳରେ ରାସ୍ତାର ମଇଳା ପାଣି ଇନ୍ଦ୍ରଦ୍ୟୁମ୍ନରେ ମିଶିବା ସହ ଘଳିଆ ଯୋଗୁ ନିକଟସ୍ଥ ଘରଗୁଡ଼ିକ ପ୍ରତି ବିପଦ ସୃଷ୍ଟି ହୋଇଛି। ତେଣୁ ପ୍ରଶାସନ ଏଥିପ୍ରତି ଦୃଷ୍ଟି ଦେବା ଜରୁରୀ।
