ମୁମ୍ବାଇ, ୧୮।୬: ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା ପରେ ବଲିଉଡରେ ଚାଲିଥିବା ବଂଶବାଦ ବିରୋଧରେ ସ୍ବର ଉଠିବାରେ ଲାଗିଛି। ସୁଶାନ୍ତଙ୍କ ଭଳି ଆତ୍ମହତ୍ୟା କରିଥିବା ଜିହା ଖାଁଙ୍କ ମା’ ରାବିୟା ଅମିନ୍ ଏବେ ମୁହଁ ଖୋଲିଛନ୍ତି। ବଲିଉଡ୍ରୁ ବଂଶବାଦ ନ ହଟିଲେ ଏଭଳି ଆତ୍ମହତ୍ୟା ଘଟଣା ଘଟିଚାଲିଥିବ ବୋଲି ରାବିୟା କହିଛନ୍ତି। ସଲମାନ୍ ଖାଁ ତାଙ୍କ ଝିଅ ଜିହାର ମୃତ୍ୟୁ ତଦନ୍ତରେ ହସ୍ତକ୍ଷେପ କରିଥିବା ସେ ଅଭିଯୋଗ ଆଣିଛନ୍ତି। ବଲିଉଡ୍ରେ ଏଭଳି ଧାରା ବନ୍ଦ ନ ହେଲେ ଫିଲ୍ମ ଦୁନିଆରେ କଳଙ୍କ ଲାଗିବ ବୋଲି ସେ କହିଛନ୍ତି। ନିଶବ୍ଦ ଏବଂ ଘଜ୍ନୀରେ ଅଭିନୟ କରିଥିବା ଜିହା ୨୦୧୩ ଜୁନ୍ ୩ରେ ଆତ୍ମହତ୍ୟା କରିଥିଲେ। ୨୦୧୩ ଜୁନ୍ ୧୦ରେ ଜିହାଙ୍କ ବୟଫ୍ରେଣ୍ଡ୍ ସୂରଜ ପାଞ୍ଚୋଲିଙ୍କୁ ପୋଲିସ ଗିରଫ କରି ପଚରା ଉଚରା ଆରମ୍ଭ କରିଥିଲା। ତେବେ ସୂରଜଙ୍କୁ ପଚରା ଉଚରା ନ କରିବା ଲାଗି ସଲମାନ ଚାପ ପକାଇଥିବା ଜିହାଙ୍କ ମା’ କହିଛନ୍ତି।
