ମୁମ୍ବାଇ: ବଲିଉଡ୍ ଦବଙ୍ଗ ଗର୍ଲ ସୋନାକ୍ଷୀ ସିହ୍ନା ତାଙ୍କ ଅପ୍ କମିଂ ଫିଲ୍ମ ‘ଦବଙ୍ଗ-୩’ର ପ୍ରମୋଶନରେ ବ୍ୟସ୍ତ ଅଛନ୍ତି। ନିକଟରେ ସେ ଏକ ସାକ୍ଷାତ୍କାରରେ କିଛି କଥା ମନଖୋଲି କଥା ହୋଇଛନ୍ତି। ସେ କହିଛନ୍ତି ଚାହୁଁ ଚାହୁଁ ଇଣ୍ଡଷ୍ଟ୍ରୀରେ ସେ ୧୦ ବର୍ଷ ପୂରଣ କରିବାକୁ ଯାଉଛନ୍ତି ହେଲେ ତାଙ୍କୁ ଆଦୌ ଜଣାପଡୁନି। କେତେ ଶୀଘ୍ର ସମୟ ଗଡି ଯାଇଛି ତାହା ତାଙ୍କୁ ବିଶ୍ୱାସ ହେଉନି। ‘ଦବଙ୍ଗ’ର ପ୍ରଥମ ଫିଲ୍ମ କାଲିଭଳି ଲାଗୁଥିଲେ ବି ଏବେ ‘ଦବଙ୍ଗ-୩’ରେ ବି ସେ ଅଭିନୟ କରିଛନ୍ତି ଏହା କେବଳ ଦର୍ଶକଙ୍କ ଭଲ ପାଇବା ଯୋଗୁ ସମ୍ଭବ ହୋଇଛି ବୋଲି ସୋନାକ୍ଷୀ କହିଛନ୍ତି। ଦର୍ଶକଙ୍କର ଏହି ଭଲପାଇବାକୁ ସେ ଜୀବନ ସାରା ପାଖରେ ରଖିବେ ବୋଲି ମତ ପ୍ରକାଶ କରିଛନ୍ତି। ସୋନାକ୍ଷୀ ତାଙ୍କ ସଫଳତାର ସମସ୍ତ ଶ୍ରେୟ ବଲିଉଡ୍ ଭାଇଜାନ ସଲମାନଙ୍କୁ ଦେଇଛନ୍ତି। କାରଣ ଫ୍ୟାଶନ ଡିଜାଇନିଂ କୋର୍ସ କରୁଥିବା ସୋନାକ୍ଷୀ କେବେ ଅଭିନୟ କରିବାକୁ ଚିନ୍ତା ବି କରି ନ ଥିଲେ। ହେଲେ ସଲମାନଙ୍କ ପ୍ରେରଣା ଓ ସହଯୋଗ ତାଙ୍କୁ ଆଜି ବଲିଉଡ୍ ନାୟିକାର ପରିଚୟ ଦେଇଛି ବୋଲି ସେ କୁହନ୍ତି।
