ନୂଆଦିଲ୍ଲୀ, ୨୮ା୫(ପି.ଟି.)- ଭାରତୀୟ ଅଲିମ୍ପିକ୍ ଆସୋସିଏଶନ(ଆଇଓଏ) ସଭାପତି ନରିନ୍ଦର ବାତ୍ରା ଅଲିମ୍ପିକ୍ ଚାନେଲ କମିଶନ ସଦସ୍ୟଭାବେ ନିଯୁକ୍ତ ହୋଇଛନ୍ତି। ଗତବର୍ଷ ଜୁନ୍ ପର୍ଯ୍ୟନ୍ତ ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି) ସଦସ୍ୟ ଥିବା ବାତ୍ରା ନୂଆ ନିଯୁକ୍ତି ପାଇଁ ଏହାର ସଭାପତି ଥୋମାସ ବ୍ୟାକ୍ଙ୍କୁ ପତ୍ର ଲେଖି କୃତଜ୍ଞତା ଜଣାଇଛନ୍ତି। ”ଅଲିମ୍ପିକ୍ ଚାନେଲ କମିଶନ ସଦସ୍ୟଭାବେ ନିଯୁକ୍ତ ହୋଇଥିବାରୁ ମୁଁ ବହୁତ ଖୁସି। ଆଇଓସିରେ ନୂଆ ଦାୟିତ୍ୱ ପାଇବା ମୋ ପାଇଁ ଗର୍ବର କଥା। ଏଥିପାଇଁ ମୁଁ ଆଇଓସି ସଭାପତିଙ୍କୁ ଧନ୍ୟବାଦ ଜଣାଉଛି“ ବୋଲି ଅନ୍ତର୍ଜାତୀୟ ହକି ଫେଡେରେଶନ ସଭାପତି ଥିବା ବାତ୍ରା ପ୍ରକାଶ କରିଛନ୍ତି। ଅଲିମ୍ପିକ୍ ଚାନେଲ କମିଶନ ସଦସ୍ୟ ଆଇଓସି ସିଜନ, ଆଇଓସି କାର୍ଯ୍ୟନିର୍ବାହୀ ବୋର୍ଡ ଏବଂ ଆଇଓସି ସଭାପତିଙ୍କୁ ବିଭିନ୍ନ ପ୍ରସଙ୍ଗରେ ପରାମର୍ଶ ଦେଇପାରିବେ। ଏହା ବ୍ୟତୀତ ଅଲିମ୍ପିକ୍ ଚାନେଲ ଆରମ୍ଭ ହେବା ଏବଂ କାର୍ଯ୍ୟ କରିବାରେ ଗାଇଡ କରିବେ। ୬୩ ବର୍ଷୀୟ ବାତ୍ରା ପୂର୍ବରୁ ୨୦୧୪ରୁ ୨୦୧୬ ପର୍ଯ୍ୟନ୍ତ ହକି ଇଣ୍ଡିଆ ସଭାପତି, ୨୦୦୩ରୁ ୨୦୧୩ ପର୍ଯ୍ୟନ୍ତ ଏସିଆନ ହକି ଫେଡେରେଶନ ସଭାପତି ଭାବେ କାର୍ଯ୍ୟ କରିଛନ୍ତି। ଏହା ବ୍ୟତୀତ ୨୦୦୩ରୁ ୨୦୧୩ ପର୍ଯ୍ୟନ୍ତ ସେ ଦିଲ୍ଲୀ ଆଣ୍ଡ ଡିଷ୍ଟ୍ରିକ୍ଟ କ୍ରିକେଟ ଆସୋସିଏଶନର କୋଷାଧ୍ୟକ୍ଷ ମଧ୍ୟ ଥିଲେ।
