କଟକ ଅଫିସ,୨୭ା୩: ପ୍ରଶାସନର ନାନା କଟକଣା ସତ୍ତ୍ବେ ଛତ୍ରବଜାରରେ ଲୋକଙ୍କ ଭିଡ଼ କମୁନାହିଁ। ବୁଧବାର ଗ୍ରାହକ ଓ ଦୋକାନୀଙ୍କ ପାଇଁ ଚିହ୍ନ ଦିଆଯାଇଥିଲା। ହେଲେ ଗୁରୁବାର ତାହାକୁ କେହି ମାନୁ ନ ଥିବା ଦେଖିବାକୁ ମିଳିଥିଲା। ଅନ୍ୟପଟେ କମ୍ ଜାଗା ଯୋଗୁ ଛତ୍ରବଜାରରେ ସାମାଜିକ ଦୂରତ୍ୱ ନିୟମ ପାଳିବା ସମ୍ଭବ ହେଉନାହିଁ। ଏହାକୁ ଦୃଷ୍ଟିରେ ରଖି ଛତ୍ରବଜାରକୁ ବାଦାମବାଡ଼ି-ଲିଙ୍କ୍ରୋଡ୍ ଛକ ପର୍ଯ୍ୟନ୍ତ ରାସ୍ତାକୁ ଘୁଞ୍ଚାଇଦେବାକୁ କଟକ ମହାନଗର ନିଗମ (ସିଏମ୍ସି) ପକ୍ଷରୁ ନିଷ୍ପତ୍ତି ନିଆଯାଇଛି। ଗୁରୁବାର ସିଏମ୍ସିର ଡେପୁଟି କମିଶନର୍ ଅଭିନାଶ ରାଉତ ଏବଂ ପୋଲିସ ଅଧିକାରୀମାନେ ଛତ୍ରବଜାରକୁ ଯାଇ ବ୍ୟବସାୟୀଙ୍କୁ ଭିଡ଼ ପାଇଁ ତାଗିଦ୍ କରିଥିଲେ। ଶୁକ୍ରବାରଠାରୁ ନୂଆ ଜାଗାକୁ ଉଠିଯିବାକୁ ନିର୍ଦ୍ଦେଶ ଦେଇଥିଲେ। ଏହାପରେ ଅଧିକାରୀମାନେ ବାଦାମବାଡ଼ି-ଲିଙ୍କ୍ରୋଡ୍କୁ ଆସି ଜାଗା ଚିହ୍ନଟ କରିଥିଲେ । ସନ୍ଧ୍ୟାରେ କଟକ ଡିସିପି ଅଖିଳେଶ୍ୱର ସିଂ ଏବଂ ଅନ୍ୟ ବରିଷ୍ଠ ପୋଲିସ ଅଧିକାରୀମାନେ ରାସ୍ତାରେ ଉଭୟ ବିକ୍ରେତା ଏବଂ ଗ୍ରାହକଙ୍କ ପାଇଁ ଚିହ୍ନ ପକାଇଛନ୍ତି।
