ନୂଆଦିଲ୍ଲୀ,୩।୧୨(ପି.ଟି.)- ମଙ୍ଗଳବାର ପ୍ରକାଶିତ ହୋଇଥିବା ବିଡବ୍ଲ୍ୟୁଏଫ୍ ର଼୍ୟାଙ୍କିଙ୍ଗ୍ରେ ଭାରତୀୟ ତାରକା ବ୍ୟାଡମିଣ୍ଟନ ଖେଳାଳି ସୌରଭ ବର୍ମା ୭ଟି ସ୍ଥାନ ଉପରକୁ ଉଠି କ୍ୟାରିୟରର ଶ୍ରେଷ୍ଠ ୨୯ତମ ସ୍ଥାନ ଅଧିକାର କରିଛନ୍ତି। ଗତ ରବିବାର ସୟଦ ମୋଦି ଅନ୍ତର୍ଜାତୀୟ ଟୁର୍ନାମେଣ୍ଟରେ ସେ ରନର୍ସଅପ୍ ବିବେଚିତ ହୋଇ ଏହି ସଫଳତା ପାଇଛନ୍ତି। ୨୬ ବର୍ଷୀୟ ସୌରଭ ୨୦୧୨ରେ ୩୦ତମ ସ୍ଥାନ ଅଧିକାର କରିଥିଲେ। ସେ ମଧ୍ୟ ଗତ ମେ’ରେ ହାଇଦ୍ରାବାଦ ଓ ସ୍ଲୋଭେନିଆ ଇଣ୍ଟରନ୍ୟାଶନାଲ ସିରିଜରେ ଦୁଇଟି ବିଡବ୍ଲ୍ୟୁଏଫ୍ ସୁପର ୧୦୦ ଟାଇଟଲ ଜିତିଥିଲେ। ଏଥି ସହିତ ଭାରତ ୬ଜଣ ଖେଳାଳି ଶ୍ରେଷ୍ଠ ୩୦ରେ ପ୍ରବେଶ କରିଛନ୍ତି। ଚାଇନାର ଶ୍ରେଷ୍ଠ ୫ ଜଣ ଖେଳାଳି ଟପ୍ ୩୦ରେ ମଧ୍ୟ ସ୍ଥାନ ପାଇଛନ୍ତି।
ସେହିପରି ମହିଳା ତାରକା ଅଶ୍ମିତା ଚାଲିହା ୧୮ଟି ସ୍ଥାନ ଉପରକୁ ଉଠି ଟପ୍- ୧୦୦ରେ ସ୍ଥାନ ପାଇଛନ୍ତି। ଅନ୍ୟପଟେ ପି.ଭି. ସିନ୍ଧୁ ଓ ସାଇନା ନେହ୍ବାଲଙ୍କ ର଼୍ୟାଙ୍କିଙ୍ଗରେ କୌଣସି ପରିବର୍ତ୍ତନ ହୋଇନାହିଁ ଓ ଯଥାକ୍ରମେ ଷଷ୍ଠ ଓ ଦଶମ ସ୍ଥାନରେ ପୂର୍ବପରି ରହିଛନ୍ତି। ଏହି ଦୁଇଜଣ ସୟଦ ମୋଦି ଇଣ୍ଟରନ୍ୟାଶନାଲ ଟୁର୍ନାମେଣ୍ଟରୁ ଓହରିଯାଇଥିଲେ। କିଡମ୍ବୀ ଶ୍ରୀକାନ୍ତ ଓ ବି ସାଇ ପ୍ରଣୀତ ଏହି ଟୁର୍ନାମେଣ୍ଟର କ୍ୱାର୍ଟର ଫାଇନାଲରେ ପରାସ୍ତ ହୋଇ ଯଥାକ୍ରମେ ପୂର୍ବପରି ୧୨ ଓ ୧୧ତମ ସ୍ଥାନରେ ରହିଛନ୍ତି।
