ନୂଆଦିଲ୍ଲୀ,୨୯ା୩: ପ୍ରାଣଘାତୀ କରୋନାକୁ ରୋକିବା ଲାଗି କେନ୍ଦ୍ର ସରକାର ବହୁବିଧ ପଦକ୍ଷେପ ଗ୍ରହଣ କରିଛନ୍ତି। ଭୂତାଣୁ ସଂକ୍ରମଣକୁ ରୋକିବା ଲାଗି ବିଦେଶରୁ ଆସୁଥିବା ଯାତ୍ରୀଙ୍କ ଉପରେ କଡ଼ା ନଜର ରଖିବା ଲାଗି କୁହାଯାଇଛି। ଗତ ଜାନୁୟାରୀ ୧୮ରୁ ଏପର୍ଯ୍ୟନ୍ତ ଭାରତକୁ ମୋଟ ୧୫ ଲକ୍ଷ ଯାତ୍ରୀ ବିଦେଶରୁ ଫେରିଥିବା କ୍ୟାବିନେଟ ସଚିବ ରାଜୀବ ଗୌବା ସୂଚନା ଦେଇଛନ୍ତି। ଏଥିଲାଗି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ପ୍ରଶାସନିକ ଅଧିକାରୀମାନେ ଯତ୍ନଶୀଳ ହୋଇ ପଦକ୍ଷେପ ଗ୍ରହଣ କରିବାକୁ ସେ ପତ୍ର ମାଧ୍ୟମରେ ପରାମର୍ଶ ଦେଇଛନ୍ତି। ସେମାନଙ୍କୁ ତୁରନ୍ତ ଚିହ୍ନଟ କରିବା ଓ ପରୀକ୍ଷାନିରୀକ୍ଷା କରିବା ଲାଗି ଗୌବା ନିର୍ଦ୍ଦେଶ ଦେଇଛନ୍ତି। ଆଗାମୀ କିଛିଦିନ ଆମ ଲାଗି ଗୁରୁୂତ୍ୱପୂର୍ଣ୍ଣ। କାହା ପାଖରେ ଯଦି କିଛି କରୋନା ଲକ୍ଷଣ ଦେଖାଯାଏ, ତେବେ ତାଙ୍କୁ ତୁରନ୍ତ ହସ୍ପିଟାଲରେ କ୍ୱାରାଣ୍ଟାଇନ୍ କରାଯାଇ ସ୍ଥାନୀୟ ଅଧିକାରୀ ପଦକ୍ଷେପ ନେଇପାରିବେ। ଏନେଇ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ମୁଖ୍ୟ ଶାସନ ସଚିବଙ୍କୁ ଗୌବା ପରାମର୍ଶ ଦେଇଛନ୍ତି। ବିଦେଶାଗତଙ୍କୁ ତୁରନ୍ତ ଚିହ୍ନଟ କରିବା ଓ ତାଙ୍କ ସଂସ୍ପର୍ଶରେ ଆସିଥିବା ଲୋକଙ୍କଠାରେ ଦେଖାଦେଉଥିବା ବିଭିନ୍ନ ଲକ୍ଷଣକୁ ପରଖିବା ମୁଖ୍ୟ କାମ। ଏହାକୁ ଅବହେଳା କଲେ ପରିସ୍ଥିତି ସଙ୍ଗିନ ହୋଇପଡ଼ିବ ବୋଲି ଗୌବା କହିଛନ୍ତି। ବିମାନବନ୍ଦରଗୁଡ଼ିକରେ ସ୍କ୍ରିନିଂ କରାଯାଉଥିଲେ ହେଁ ବାହାରୁ ଆସିଥିବା ଲୋକଙ୍କ ପ୍ରତି ଅଧିକ ଧ୍ୟାନ ଦିଆଯିବାର ଆବଶ୍ୟକତା ରହିଛି। ଯେପରି କରୋନା ମହାମାରୀ ନ ବ୍ୟାପେ ସେଥିପ୍ରତି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ସତର୍କ ଓ ପ୍ରସ୍ତୁତ ରହିବାକୁ ସେ ପରାମର୍ଶ ଦେଇଛନ୍ତି।
