ନୂଆଦିଲ୍ଲୀ,୨୭ା୭(ପି.ଟି.)
ଟିମ୍ ଇଣ୍ଡିଆ ଅଧିନାୟକ ବିରାଟ କୋହଲି ଓ ଡେପୁଟି ରୋହିତ ଶର୍ମାଙ୍କ ମଧ୍ୟରେ ବିବାଦ ରହିଥିବା ନେଇ ଗଣମାଧ୍ୟମରେ ଖବର ପ୍ରକାଶ ପାଇଥିଲା। ତେବେ ଏହି ଘଟଣାକୁ ପ୍ରଶାସକ କମିଟି(ସିଓଏ) ଅଧ୍ୟକ୍ଷ ବିନୋଦ ରୟ ଶୁକ୍ରବାର ଖଣ୍ଡନ କରିଛନ୍ତି। ଗଣମାଧ୍ୟମରେ ଉଭୟଙ୍କ ମଧ୍ୟରେ ବିବାଦ ରହିଥିବା ଯେଉଁ ଖବର ପ୍ରକାଶ ପାଇଛି ତାହା ଏକ ଗଳ୍ପ ବୋଲି ରୟ ଅଭିହିତ କରିଛନ୍ତି। ନ୍ୟୁଜିଲାଣ୍ଡ ବିପକ୍ଷ ସେମିଫାଇନାଲରେ ଭାରତର ପରାଜୟ ପରେ ବିରାଟ ଓ ରୋହିତଙ୍କ ମଧ୍ୟରେ କଳହ ହୋଇଥିବା ସୋସିଆଲ ମିଡିଆରେ ଚର୍ଚ୍ଚା ହୋଇଥିଲା। ଏପରି କି ଏହି ଘଟଣା ପରେ ବିସିସିଆଇ ରୋହିତଙ୍କୁ ସୀମିତ ଓଭର କ୍ରିକେଟ୍ ଓ ବିରାଟଙ୍କୁ ଟେଷ୍ଟ କ୍ରିକେଟ୍ର ଅଧିନାୟକ କରିବା ଲାଗି ଯୋଜନା କରୁଥିବା ରିପୋର୍ଟ ପ୍ରକାଶ ପାଇଥିଲା। ମାତ୍ର ପରବର୍ତ୍ତୀ ସମୟରେ ବିସିସିଆଇ ଅଧିକାରୀମାନେ ଏହାକୁ ମଧ୍ୟ ଖଣ୍ଡନ କରିଦେଇଛନ୍ତି। ଏ ସମ୍ପର୍କିତ ପ୍ରଶ୍ନର ଉତ୍ତର ଦେଇ ରୟ କହିଛନ୍ତି ଯେ, ଏହି ଷ୍ଟୋରି ମିଡିଆ ତିଆରି କରିଛି ଓ ଏଥିରେ କୌଣସି ସତ୍ୟତା ନାହିଁ। ରୋହିତ ଶର୍ମା ବିଶ୍ୱକପରେ ରେକର୍ଡ ୫ଟି ଶତକ ସହ ସର୍ବାଧିକ ରନ ସଂଗ୍ରହକାରୀ ବ୍ୟାଟ୍ସମ୍ୟାନ ହୋଇଥିବାବେଳେ ବିରାଟ ୫ଟି ଅର୍ଦ୍ଧଶତକ ସହ ଏହି ଟୁର୍ନାମେଣ୍ଟରେ ଭଲ ସ୍କୋର କରିପାରିଥିଲେ।
