ଫୁଲବାଣୀ ଅଫିସ/ଫିରିଙ୍ଗିଆ,୨୦ା୯- ଫିରଙ୍ଗିଆ ପଞ୍ଚାୟତ ତଣ୍ଡ୍ରିଗାଁ ନାଳ ପାଖ ବିଲରେ କାଶିନିପଦର ପଞ୍ଚାୟତ ତଳପଡା ଗ୍ରାମର ବିମଳ କହଁରଙ୍କୁ ହତ୍ୟା ଘଟଣାର ପର୍ଦ୍ଦାଫାଶ କରିଛି ପୋଲିସ। ଏହି ଘଟଣାରେ ୨ ଜଣଙ୍କୁ ଗିରଫ କରାଯାଇଛି। ସେମାନେ ହେଲେ କଟେଡମାହାର ବରୁଣ କହଁର ଓ ଲାମ୍ବାଗୁଡ୍ରି ଗ୍ରାମର ଅରବିନ୍ଦ କହଁର। ହତ୍ୟାକାଣ୍ଡରେ ବ୍ୟବହୃତ କାତି ସହ ଟର୍ଚ୍ଚ ଲାଇଟ, ମୋବାଇଲ ଫୋନକୁ ପୋଲିସ ଜବତ କରିଛି। ବିମଳଙ୍କ ସାଙ୍ଗ ବରୁଣ ଘଟଣାର ମାଷ୍ଟର ମାଇଣ୍ଡ । ପ୍ରେମ ସମ୍ପର୍କକୁ ନେଇ ବିମଳଙ୍କୁ ହତ୍ୟା କରାଯାଇଥିବା ପୋଲିସ ସୂଚନା ଦେଇଛି। ପୋଲିସ ସୂଚନା ଅନୁଯାୟୀ, ବିମଳ ଏବଂ ବରୁଣ ଦୁହେଁ ଭଲ ସାଙ୍ଗ। ସେମାନେ ବାଙ୍ଗାଲୋରରେ ରହି କାମ କରୁଥିଲେ। ବିମଳଙ୍କର ଏକାଧିକ ଝିଅଙ୍କ ସହ ପ୍ରେମ ସମ୍ପର୍କ ରହିଥିବା ବରୁଣ ଜାଣିଥିଲେ। ହତ୍ୟାକାଣ୍ଡ ଘଟିବାର ୨ମାସ ପୂର୍ବରୁ ବରୁଣଙ୍କ ଜଣେ ସମ୍ପର୍କୀୟାଙ୍କ ସହ ବିମଳଙ୍କର ପ୍ରେମ ସମ୍ପର୍କ ଆରମ୍ଭ ହୋଇଥିଲା। ଉଭୟେ ଫୋନରେ କଥା ହେଉଥିଲେ। ଏହା ଜାଣିବା ପରେ ଏଥିରୁ ନିବୃତ ରହିବାକୁ ବିମଳଙ୍କୁ ବରୁଣ କହିଥିଲେ। ହେଲେ ସେ ଏହାକୁ ମାନି ନ ଥିଲେ। ୨୦ଦିନ ପୂର୍ବରୁ ବରୁଣ ବାଙ୍ଗାଲୋରରୁ ଘରକୁ ଆସିଥିଲେ। ବିମଳ ୧ ତାରିଖରେ ଗାଁରେ ଆସି ପହଞ୍ଚିବେ ବୋଲି ସାଙ୍ଗ ହିସାବରେ ବରୁଣଙ୍କୁ କହିଥିଲେ। ଏହା ଜାଣିବା ପରେ ତାଙ୍କୁ ହତ୍ୟା କରିବା ପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ ହୋଇଥିଲା। ଘଟଣା ଦିନ ବରୁଣ ଏବଂ ଅରବିନ୍ଦ ଏକ ବାଇକରେ ଶଙ୍କରାଖୋଲ ଆସି ବିମଳଙ୍କୁ ସାଙ୍ଗରେ ନେଇଥିଲେ। ବୁଲାବୁଲି କରିବା ପରେ ଘଟଣାସ୍ଥଳକୁ ନେଇ ହତ୍ୟା କରିଥିଲେ ବୋଲି ଥାନାଧିକାରୀ ପି.ଶ୍ୟାମସୁନ୍ଦର ରାଓ ସୂଚନା ଦେଇଛନ୍ତି। ସୂଚନାଯୋଗ୍ୟ, ଗତ ୨ ତାରିଖ ଭୋରରେ ବିମଳଙ୍କ ମୃତଦେହ ତଣ୍ଡ୍ରିଗାଁ ନାଳ ପାଖରେ ପଡିଥିଲା। ଧାରୁଆ ଅସ୍ତ୍ରରେ ତାଙ୍କ ବେକକୁ ହଣା ଯାଇଥିବା ବେଳେ ମୁହଁକୁ ପଥରରେ ଛେଚି ଦିଆଯାଇଥିବା ଦେଖି ଲୋକେ ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚି ମୃତଦେହ ଜବତ କରିବା ସହ ତଦନ୍ତ ଆରମ୍ଭ କରିଥିଲା।
