ବାସେଲ(ସୁଇଜରଲାଣ୍ଡ), ୨୧।୮ (ପି.ଟି.): ଅଲିମ୍ପିକ ରୌପ୍ୟ ପଦକ ବିଜୟିନୀ ପି.ଭି. ସିନ୍ଧୁ ଏଠାରେ ଚାଲିଥିବା ବ୍ୟାଡ୍ମିଣ୍ଟନର ସର୍ବୋଚ୍ଚ ପ୍ରତିଯୋଗିତା ବିଶ୍ୱ ଚାମ୍ପିୟନଶିପ୍ରେ ବିଜୟରୁ ଅଭିଯାନ ଆରମ୍ଭ କରିଛନ୍ତି। ବୁଧବାର ଅନୁଷ୍ଠିତ ମହିଳା ସିଙ୍ଗଲ୍ସ ୨ୟ ରାଉଣ୍ଡର ଏକ ମୁକାବିଲାରେ ସେ ୨୧-୧୪, ୨୧-୧୪ ସିଧାସଳଖ ଗେମ୍ରେ ଚାଇନିଜ ତାଇପେଇର ପାଇ ୟୁ ପୋ’ଙ୍କୁ ପରାସ୍ତ କରିଛନ୍ତି। ବିଶ୍ୱ ଚାମ୍ପିୟନଶିପ୍ ପ୍ରତିଯୋଗିତାରେ ସିନ୍ଧୁଙ୍କ ଏହା ୧୭ତମ ବିଜୟ ଥିଲା। ୨୦୧୩ରୁ ସେ ଏହି ଟୁର୍ନାମେଣ୍ଟ ଖେଳିଆସୁଛନ୍ତି। ଏଥିସହ ଏହି ସମ୍ମାନଜନକ ପ୍ରତିଯୋଗିତାରେ ସର୍ବାଧିକ ମହିଳା ସିଙ୍ଗଲ୍ସ ମ୍ୟାଚ୍ ଜିତିବାରେ ସେ ସ୍ପାନିଶ ବ୍ୟାଡ୍ମିଣ୍ଟନ ତାରକା କାରୋଲିନା ମାରିନ୍ଙ୍କ ସମକକ୍ଷ ହୋଇଛନ୍ତି। ପ୍ରଥମ ରାଉଣ୍ଡରେ ବାଏ ପାଇଥିବା ସିନ୍ଧୁଙ୍କ ଏହି ମ୍ୟାଚ୍ ଜିତିବାକୁ ୪୩ ମିନିଟ୍ ସମୟ ନେଇଥିଲେ। ପ୍ରି-କ୍ୱାର୍ଟର ଫାଇନାଲରେ ୫ମ ସିଡ୍ ସିନ୍ଧୁଙ୍କ ମୁକାବିଲା ଆମେରିକାର ବେଇଓ୍ବିନ ଝାଙ୍ଗ୍ଙ୍କ ସହ ହେବ। ଗତବର୍ଷ ଇଣ୍ଡିଆ ଓପନ୍ ଫାଇନାଲରେ ଝାଙ୍ଗ୍ଙ୍କ ନିକଟରୁ ପରାସ୍ତ ହୋଇ ସିନ୍ଧୁ ରନର୍ସଅପ୍ରେ ସନ୍ତୁଷ୍ଟ ରହିଥିଲେ। ଅପରପକ୍ଷରେ ମହିଳା ଡବଲ୍ସରେ ଭାରତୀୟ ଯୋଡ଼ି ଜାକ୍କାପୁଡି ମେଘନା ଓ ପୁରଭିଶା ଏସ୍. ରାମ ୮-୨୧, ୧୮-୨୧ ସିଧାସଳଖ ଗେମ୍ରେ ଜାପାନ ଯେଡ଼ିଙ୍କ ନିକଟରୁ ହାରି ପ୍ରତିଯୋଗିତାରୁ ବିଦାୟ ନେଇଛନ୍ତି।
