ବନ୍ତଳା, ୫।୧(ଡି.ଏନ.ଏ.)-ଅନୁଗୋଳ ବନଖଣ୍ଡ ପୁପୁଣ୍ଡା ସେକ୍ସନ ବିଟ୍ ଅଧୀନ ବୃନ୍ଦାବନପୁର ଗ୍ରାମରୁ ରବିବାର ସକାଳେ ଏକ ମାଖନ ହାତୀର ମୃତଦେହ ଉଦ୍ଧାର କରାଯାଇଛି। ମୃତହାତୀର ଆନୁମାନିକ ବୟସ ୨୦ ବର୍ଷ ହେବ। ବିଷାକ୍ତ ଖାଦ୍ୟ ଖାଇ ହାତୀଟିର ମୃତ୍ୟୁ ହୋଇଥିବା ବନ ବିଭାଗ ପକ୍ଷରୁ ସ୍ପଷ୍ଟ କରାଯାଇଛି। ମୃତ୍ୟୁ ପୂର୍ବରୁ ହାତୀଟି ୧୦୦ ମିଟର ଦୂରରୁ ଘୋଷାଡ଼ି ହୋଇ ଆସିଥିବା ପାରିପାର୍ଶ୍ୱିକ ସ୍ଥିତିରୁ ଜଣାପଡ଼ିଛି।
ସୂଚନାପାଇ ଡିଏଫଓ ଭି. କାର୍ତ୍ତିକ, ଏସିଏଫ ବାସୁଦେବ ବେହେରା, ପ୍ରୋବେଶନାଲ ଆଇଏଫଏସ୍ ସାଇ କରଣ, ରେଞ୍ଜ ଅଧିକାରୀ ସତ୍ୟବ୍ରତ ପ୍ରଧାନ ପ୍ରମୁଖ ସଦଳବଳ ଘଟଣାସ୍ଥଳରେ ପହଞ୍ଚତ୍ ତଦନ୍ତ କରିଛନ୍ତି। ଜିଲା ପ୍ରାଣୀଧନ ଚିକିତ୍ସା ବିଭାଗର ଡେପୁଟି ନିର୍ଦ୍ଦେଶକ ଡ. ଭରତ ଚନ୍ଦ୍ର ଗଡ଼ନାୟକ, ସାତକୋଶିଆ ପ୍ରାଣୀ ଚିକିତ୍ସକ ଡ. କିଶୋର ଚନ୍ଦ୍ର ସାହୁ, ଭିଏସ୍ ଡ. ସୁଶାନ୍ତ କୁମାର ସେଠୀ ପ୍ରମୁଖ ମୃତଦେହ ବ୍ୟବଚ୍ଛେଦ କରାଇଥିଲେ। ଏଥିରୁ ବିଷାକ୍ତ ଖାଦ୍ୟ ଖାଇ ହାତୀଟିର ମୃତ୍ୟୁ ହୋଇଥିବା ଜଣାପଡ଼ିଛି।
ଏ ନେଇ ଜିଲା ପ୍ରାଣୀଧନ ବିଭାଗର ଡେପୁଟି ନିର୍ଦ୍ଦେଶକ ଡ. ଗଡ଼ନାୟକ କୁହନ୍ତି, ବିଷାକ୍ତ ଖାଦ୍ୟ ଖାଇ ମାଖନ ହାତୀ ପ୍ରାଣ ହରାଇଛି। ଅଧିକ ପରୀକ୍ଷା ପାଇଁ ନମୁନା ସଂଗ୍ରହ କରି ଭୁବନେଶ୍ୱରସ୍ଥିତ ଲାବୋରେଟାରିକୁ ପଠାଯିବ। ରିପୋର୍ଟ ଆସିଲା ପରେ ସମ୍ପୂର୍ଣ୍ଣ ତଥ୍ୟ ଜଣାପଡ଼ିବ।
