ନୂଆଦିଲ୍ଲୀ, ୧୬।୧ (ପି.ଟି.)- ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ) ଏହାର ବାର୍ଷିକ କେନ୍ଦ୍ରୀୟ ଚୁକ୍ତି ତାଲିକାରୁ ଗୁରୁବାର ମହେନ୍ଦ୍ର ସିଂ ଧୋନୀଙ୍କ ନାମକୁ ବାଦ୍ ଦେଇଛି। ଫଳରେ ଭାରତୀୟ କ୍ରିକେଟ୍ ଦଳର ଅନ୍ୟତମ ସଫଳ ଅଧିନାୟକ ରହିଥିବା ଧୋନୀଙ୍କ ଭବିଷ୍ୟତକୁ ନେଇ ବେଶ୍ କିଛିଦିନ ହେବ ଲାଗି ରହିଥିବା କଳ୍ପନା ଜଳ୍ପନା ପୁଣିଥରେ ଉଜ୍ଜୀବିତ୍ ହୋଇଉଠିଛି।
ପକ୍ଷରୁ ୨୦୧୯ ଅକ୍ଟୋବରରୁ ୨୦୨୦ ସେପ୍ଟେମ୍ବର ପର୍ଯ୍ୟନ୍ତ କେନ୍ଦ୍ରୀୟ ଖେଳାଳି ଚୁକ୍ତି ତାଲିକା ପ୍ରକାଶ ପାଇଛି। ପୂର୍ବରୁ ଧୋନୀ ‘ଏ’ କାଟେଗୋରୀରେ ରହିଥିଲେ। ଏଥିରେ ଜଣେ ଖେଳାଳିଙ୍କୁ ବର୍ଷକୁ ୫ କୋଟି ଟଙ୍କା ପ୍ରଦାନ କରାଯାଇଥାଏ। ତେବେ ଧୋନୀ ଶେଷଥର ପାଇଁ ଗତବର୍ଷ ଆଇସିସି ବିଶ୍ୱକପ୍ ସେମିଫାଇନାଲରେ ନ୍ୟୁଜିଲାଣ୍ଡ ବିପକ୍ଷରେ ଖେଳିଥିଲେ। ଏହାପରଠାରୁ ସେ କ୍ରିକେଟ୍ରୁ ଦୂରେଇ ରହିଛନ୍ତି। ଏହି କାରଣରୁ ଧୋନୀଙ୍କୁ କେନ୍ଦ୍ରୀୟ ଚୁକ୍ତିରୁ ବାଦ୍ ଦିଆଯିବାକୁ ନେଇ ଅନେକ ପୂର୍ବତନ କ୍ରିକେଟର୍ ଆଶ୍ଚର୍ଯ୍ୟପ୍ରକଟ କରିନାହାନ୍ତି। ଧୋନୀ ଏକଦିବସୀୟ କ୍ରିକେଟରୁ ଅବସର ନେଇ ପାରନ୍ତି ବୋଲି ମୁଖ୍ୟକୋଚ୍ ରବି ଶାସ୍ତ୍ରୀ ନିକଟରେ ସଙ୍କେତ ଦେଇଥିଲେ। ଅଧିନାୟକ ବିରାଟ କୋହଲିଙ୍କ ସମେତ ରୋହିତ୍ ଶର୍ମା ଓ ଦ୍ରୁତ ବୋଲର ଯଶପ୍ରୀତ୍ ବୁମ୍ରା ସର୍ବୋଚ୍ଚ କାଟେଗୋରୀ ‘+ଏ’ରେ ରହିଛନ୍ତି। ଏହି କାଟାଗୋରୀର ଖେଳାଳି ବର୍ଷକୁ ବିସିସିଆଇ ନିକଟରୁ ୭ କୋଟି ଟଙ୍କା ପାଇଥାନ୍ତି। ସେହିଭଳି ଉଦୀୟମାନ ବ୍ୟାଟ୍ସମ୍ୟାନ ଲୋକେଶ ରାହୁଲ ‘ବି’ ରୁ ‘ଏ’ କାଟେଗୋରୀକୁ ଉଠିଛନ୍ତି। ଅଷ୍ଟ୍ରେଲିଆ ବିପକ୍ଷରେ ଟେଷ୍ଟ ପଦାର୍ପଣ କରି ଦମ୍ଦାର ବ୍ୟାଟିଂ ପ୍ରଦର୍ଶନ ଜାରି ରଖିଥିବା ଓପନର୍ ମୟଙ୍କ ଅଗ୍ରଓ୍ବାଲଙ୍କୁ ‘ବି’ କାଟେଗୋରୀରେ ସାମିଲ କରାଯାଇଛି। ଏଥିରେ ଖେଳାଳିଙ୍କୁ ୩ କୋଟି ଟଙ୍କା ମିଳିଥାଏ। ଦ୍ରୁତ ବୋଲର ନବଦୀପ ସଇନି, ଓ୍ବାଶିଂଟନ ସୁନ୍ଦର ପ୍ରଥମଥର ଲାଗି କେନ୍ଦ୍ରୀୟ ଚୁକ୍ତିରେ ସାମିଲ ହୋଇଛନ୍ତି। ଉଭୟ ଶ୍ରେୟାସ ଆୟାର, ଦୀପକ ଚହର ଓ ଶାର୍ଦ୍ଦୁଳ ଠାକୁରଙ୍କ ସହ ଗ୍ରେଡ-ସି’ରେ ରହିଛନ୍ତି। ଏ ସମସ୍ତେ ଏକ କୋଟି ଲେଖାଏ ପାଇବେ। ତେବେ ଅମ୍ବାତି ରାୟୁଡୁ ଓ ଦୀନେଶ କାର୍ତ୍ତିକ କେନ୍ଦ୍ରୀୟ ଚୁକ୍ତି ତାଲିକାରୁ ବାଦ୍ ପଡ଼ିଛନ୍ତି।
