ନୂଆଦିଲ୍ଲୀ,୧୮।୪(ପି.ଟି.)- ବର୍ତ୍ତମାନ ସାରା ଦେଶ କୋଭିଡ୍-୧୯ ମୁକାବିଲାରେ ବ୍ୟସ୍ତ ଥିବାବେଳେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସରକାରଙ୍କୁ ସାହାଯ୍ୟ ସମର୍ଥନ କରିବାରେ ପଛରେ ପଡିନାହିଁ। ଘରୁ ବାହାରିବା ବେଳେ ସମସ୍ତେ ମାସ୍କ ପିନ୍ଧି ବାହାରନ୍ତୁ ବୋଲି ସରକାରଙ୍କ ତରଫରୁ ଅପିଲ କରାଯାଇଛି। ଏହାକୁ ସମର୍ଥନ କରି ବିସିସିଆଇ ଏକ ଭିଡିଓ ତିଆରି କରି ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ସହ ନୂଆ ବାର୍ତ୍ତା ଦେବାକୁ ପ୍ରୟାସ କରିଛି। ଏହି ଭିଡିଓର ନାମ ରହିଛି ‘ଟିମ୍ ମାସ୍କ ଫୋର୍ସ’। ଏହି ଭିଡିଓ ଦେଶର ଦୁଇ ମହାନ୍ କ୍ରିକେଟ ସଚିନ ତେନ୍ଦୁଲକର ଓ ବିରାଟ କୋହଲିଙ୍କ ବାର୍ତ୍ତା ରହିଛି। ଏହି ଭିଡିଓରେ ବିସିସିଆଇର କେତେକ ବରିଷ୍ଠ ଅଧିକାରୀଙ୍କୁ ମଧ୍ୟ ଦେଖିବାକୁ ମିଳିଛି।
ଭାରତୀୟ ଦଳରେ ସାମିଲ ହେବା ନିଶ୍ଚିତ ଭାବେ ବଡ଼ କଥା। ତେବେ ବର୍ତ୍ତମାନ ଆମେ ଆହୁରି ଏକ ବଡ଼ ଦଳ ଗଠନ ଉପରେ ଧ୍ୟାନ ଦେଉଛୁ। ଏହା ହେଉଛି ‘ଟିମ୍ ମାସ୍କ ଫୋର୍ସ’ ବୋଲି କୋହଲି ଭିଡିଓରେ ବାର୍ତ୍ତା ଦେଉଥିବାର ଦେଖାଯାଇଛି। ସେହିପରି ମାସ୍କ ବନାଇ ମାସ୍କ ଫୋର୍ସର ଅଂଶ ହୁଅନ୍ତୁ, ୨୦ ସେକେଣ୍ଡ ପାଇଁ ହାତ ଧୁଅନ୍ତୁ ଓ ସାମାଜିକ ଦୂରତ୍ୱ ରକ୍ଷା କରନ୍ତୁ ବୋଲି ସଚିନ ଏହି ଭିଡିଓରେ ବାର୍ତ୍ତା ଦେଇଛନ୍ତି।
ଏହି ଭିଡିଓରେ ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲି, ସ୍ମୃତି ମାନ୍ଧନା, ରୋହିତ ଶର୍ମା, ହରଭଜନ ସିଂ, ହରମନପ୍ରୀତ କୌର, ବୀରେନ୍ଦ୍ର ସଓ୍ବୋଗ, ରାହୁଲ ଡ୍ରାଭିଡ ଓ ମିଥାଲି ରାଜ୍ ମାସ୍କ ବ୍ୟବହାରର ଗୁରୁତ୍ୱ ଓ ଆବଶ୍ୟକତା ଉପରେ ବାର୍ତ୍ତା ପ୍ରଦାନ କରିଛନ୍ତି। ଏଥିସହିତ ସରକାରଙ୍କ ନିର୍ଦ୍ଦେଶାବଳୀ ମାନିବାକୁ ମଧ୍ୟ ଏମାନେ ନିବେଦନ କରିଛନ୍ତି। ଘରେ ବସି ମାସ୍କ ତିଆରି କରିନ୍ତୁ । ମୁଁ ମଧ୍ୟ ମାସ୍କ ତିଆରି କରିଛି ବୋଲିି ରୋହିତ କହିଛନ୍ତି। ପୂର୍ବରୁ ବିସିସିଆଇ କରୋନା ଭାଇରସ ଲଢେଇ ବିପକ୍ଷରେ ୫୧ ଲକ୍ଷ ଟଙ୍କା ପ୍ରଧାନମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ପ୍ରଦାନ କରିଥିଲା।
