ପାଟନା,୧୫।୩: ପୃଥିବୀସାରା ଏବେ କରୋନା ସଂକ୍ରମଣକୁ ନେଇ ଆତଙ୍କ ସୃଷ୍ଟି ହୋଇଛି। କରୋନା ଯେତିକି ଆତଙ୍କ ନ ସୃଷ୍ଟି କରୁଛି, ତାହାଠାରୁ ଲୋକଙ୍କୁ ବେଶି ଭୟଭୀତ କରୁଛି ସଂକ୍ରମଣ ନେଇ ଗୁଜବ। କେତେକ ଚିକେନ ଖାଇବାକୁ ମନା କରୁଛନ୍ତି। ତେଣୁ କୁକୁଡ଼ା ଚାଷୀ କ୍ଷତିଗ୍ରସ୍ତ ହେବାରେ ଲାଗିଛନ୍ତି। ଏବେ ବିହାର ଅରଓ୍ବାଲ ଜିଲାର ଜଣେ ଚାଷୀ ନିଜ ଘର ଛାତ ଉପରେ ଚଢ଼ି କୁକୁଡ଼ା ତଳକୁ ଉଡ଼ାଇଛନ୍ତି। ସ୍ଥାନୀୟ ଖୋଖଡ଼ି ଗାଁରେ ଏଭଳି ଦୃଶ୍ୟ ପ୍ରାୟ ଘଣ୍ଟାଏ ଧରି ଦେଖିବାକୁ ମିଳିଛି। ଚାଷୀ ଛାତ ଉପରେ ଚଢ଼ି କୁକୁଡ଼ା ବର୍ଷା କରିଥିଲେ। ଲୋକେ ଜମା ହୋଇ ଯିଏ ଯେତେ ପାରିଲା ସେତେ କୁକୁଡ଼ା ଘରକୁ ବୋହି ନେଇଥିଲେ। ଚାଷୀଙ୍କ କୁକୁଡ଼ା ଗୋଟାକୁ ୪ ଟଙ୍କାରେ ବି କେହି କିଣୁ ନ ଥିଲେ। ପାଖରେ ଟଙ୍କା ଅଭାବରୁ କୁକୁଡ଼ାଙ୍କୁ ଖାଦ୍ୟ ଯୋଗାଇବା ଅସମ୍ଭବ ହୋଇ ପଡ଼ିଥିଲା। ତେଣୁ ସେ ବାଧ୍ୟ ହୋଇ ୫ ହଜାର କୁକୁଡ଼ା ଏଭଳି ଛାତରୁ ତଳକୁ ପକାଇଥିଲେ। କରୋନା ଭୟରେ ଟଙ୍କା ଦେଇ କୁକୁଡ଼ା କିଣୁ ନ ଥିବା ଲୋକ କିନ୍ତୁ ମାଗଣାରେ ଘରକୁ କୁକୁଡ଼ା ବୋହି ନେଇଥିବା ଚାଷୀ କହିଛନ୍ତି। ୪୮ ସେକେଣ୍ଡର ଏହି ଭିଡ଼ିଓ ଏବେ ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି।
