ଭୁବନେଶ୍ୱର,୯।୧୧(ବ୍ୟୁରୋ): ‘ବୁଲ୍ବୁଲ୍’ ଓଡ଼ିଶା ଉପକୂଳ ଦେଇ ଗତି କରୁଅଛି। ଏହାର ପ୍ରଭାବରେ ଉତ୍ତର ତଥା ଉପକୂଳ ଓଡ଼ିଶା କେତେକ ସ୍ଥାନରେ ପ୍ରବଳ ବର୍ଷା ହେବା ସହ ପବନ ହୋଇଛି। ଏହା ଦ୍ୱାରା ରାସ୍ତାରେ ଗଛ ପଡିବା ଭଳି ସମସ୍ୟା ସୃଷ୍ଟି ହୋଇଛି। ଅନେକ ସ୍ଥାନରେ ଲୋକଙ୍କୁ ସୁରକ୍ଷିତ ସ୍ଥାନକୁ ନେବା ସହ ପୁନରୁଦ୍ଧାର କାର୍ଯ୍ୟ ଜାରିରହିଛି। ଏହି କାର୍ଯ୍ୟରେ ୧୫ ଜିଲାର ସମସ୍ତ ବିଜୁ ଯୁବ ବାହିନୀ ସ୍ବେଚ୍ଛାସେବୀ ଜିଲା ପ୍ରଶାସନକୁ ସହାୟତାର ହାତ ବଢାଇଛନ୍ତି। ବୁଲ୍ବୁଲ୍ ପୂର୍ବ ପ୍ରସ୍ତୁତି ଏବଂ ଏହାର ପ୍ରଭାବରେ ହୋଇଥିବା କ୍ଷତିର ପୁନରୁଦ୍ଧାର କାର୍ଯ୍ୟ ବାହିନୀ ପକ୍ଷରୁ ଜାରି ରହିବ। ଏନେଇ ଶୁକ୍ରବାରଠାରୁ ରାଜ୍ୟ ଯୁବ କଲ୍ୟାଣ ବୋର୍ଡ କାର୍ଯ୍ୟନିର୍ବାହୀ ଅଧ୍ୟକ୍ଷ ବିଜୟ କୁମାର ନାୟକ ସ୍ବେଚ୍ଛାସେବୀଙ୍କୁ ଆହ୍ବାନ ଦେଇଥିଲେ। ବୁଲ୍ବୁଲ୍ ପ୍ରଭାବରେ ଭଦ୍ରକ, କେନ୍ଦ୍ରାପଡା, ଜଗତସିଂହପୁର, ଭଦ୍ରକ, ବାଲେଶ୍ୱର ଓ ମୟୂରଭଞ୍ଜ ଆଦି ଜିଲାରେ ହୋଇଥିବା କ୍ଷୟକ୍ଷତି ପରେ ଯୁବ ବାହିନୀର ସଦସ୍ୟମାନେ ଉଦ୍ଧାର କାର୍ଯ୍ୟ କରିଥିବା ଜଣାପଡିଛି। ଉଲ୍ଲେଖଯୋଗ୍ୟ,ବିଜୁ ଯୁବ ବାହିନୀର ସ୍ବେଚ୍ଛାସେବୀମାନେ ୨୦୧୮ ‘ତିତ୍ଲି’ ଓ ୨୦୧୯ ‘ଫନୀ’ ସମୟରେ ପ୍ରଶଂସନୀୟ କାର୍ଯ୍ୟ କରିଥିଲେ। ‘ବୁଲ୍ବୁଲ୍’ ଦ୍ୱାରା ଯେପରି କୌଣସି ଧନଜୀବନ ହାନି ନ ହୁଏ, ସେଥିପ୍ରତି ସ୍ବତନ୍ତ୍ର ଦୃଷ୍ଟି ଦେବାକୁ ବିଜୁ ଯୁବ ବାହିନୀ ସ୍ବେଚ୍ଛାସେବୀମାନଙ୍କୁ ନିର୍ଦ୍ଦେଶ ଦିଆଯାଇଛି।
