ବୃଦ୍ଧାଙ୍କୁ ଦଳିଦେଲା ଦନ୍ତା
8:27 pmMarch 5, 2020 / 43

ବଇଣ୍ଡା,୫।୩(ଡି.ଏନ.ଏ.)-କିଶୋରନଗର ବ୍ଲକ ହଣ୍ଡପା ଥାନା କମରେଇ ଗ୍ରାମରେ ବୁଧବାର ବିଳମ୍ବିତ ରାତିରେ ଏକ ଦନ୍ତା ହାତୀ ତାଣ୍ଡବ କରିଛି। ଗ୍ରାମର ୩ଟି ଚାଳଘର ଭାଙ୍ଗିବାସହ ଘର ଭିତରେ ଶୋଇଥିବା ସେହି ଗ୍ରାମର ଦେବକୀ ବେହେରା(୬୦)ଙ୍କୁ ଦଳି ମାରି ଦେଇଛି। ଏହାକୁ ନେଇ ଗ୍ରାମରେ ଉତ୍ତେଜନା ଦେଖାଦେଇଛି।
ଘଟଣାରୁ ଜଣାପଡ଼ିଛି, ଗତ କିଛିଦିନ ହେବ ଏହି ଅଞ୍ଚଳରେ ଏକ ହାତୀ ଉପଦ୍ରବ କରି ବ୍ୟାପକ ଫସଲ ନଷ୍ଟ କରୁଛି। ବୁଧବାର ରାତିରେ ଉକ୍ତ ଦନ୍ତାହାତୀ କମରେଇ ଗ୍ରାମକୁ ଆସି ରବି ନାୟକ, ଜମ୍ବୁ ପଲେଇ, ଦେବକୀ ବେହେରାଙ୍କ ଘରକୁ ଭାଙ୍ଗି ଥିଲା। ପରେ ଶୋଇଥିବା ଅବସ୍ଥାରେ ଦେବକୀଙ୍କୁ ଶୁଣ୍ଢରେ ଟାଣି ଆଣି ପାଦରେ ଦଳି ମାରି ଦେଇଥିଲା। ଖବରପାଇ ହଣ୍ଡପା ରେଞ୍ଜର ଚୈତନ୍ୟ ବେହେରା ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ। ବନବିଭାଗ ପକ୍ଷରୁ ହାତୀକୁ ଘଉଡା ଯାଉ ନ ଥିବା ଯୋଗୁ ଉତ୍ତେଜିତ ଗ୍ରାମବାସୀ ରେଞ୍ଜରଙ୍କ ସହ ବନ କର୍ମଚାରୀଙ୍କୁ ଘେରାଉ କରିଥିଲେ। ବନବିଭାଗ ପକ୍ଷରୁ ମୃତବୃଦ୍ଧାଙ୍କ ପରିବାର ଲୋକଙ୍କୁ ୪ ଲକ୍ଷ ଟଙ୍କାର କ୍ଷତିପୂରଣ ଯୋଗାଇ ଦେବାସହ ଶିଘ୍ର ଉକ୍ତ ଦନ୍ତାକୁ ଘଉଡାଯିବ ବୋଲି ପ୍ରତିଶ୍ରୁତି ଦେବା ପରେ ପରିସ୍ଥିତି ଶାନ୍ତ ପଡ଼ିଥିଲା। ଶେଷରେ ହଣ୍ଡପା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ହଣ୍ଡପା ସ୍ବାସ୍ଥ୍ୟକେନ୍ଦ୍ର ପଠାଇଛି। ଏ ନେଇ ଏକ ଅପମୃତ୍ୟୁ ମାମଲା ରୁଜୁ ହୋଇଛି।