ବୋଲଗଡ଼,୧୩ା୭(ଡି.ଏନ୍.ଏ.): ବୋଲଗଡ଼ ବ୍ଲକରେ ଶୁକ୍ରବାର ବାହୁଡ଼ା ଯାତ୍ରା ଅନୁଷ୍ଠିତ ହୋଇଯାଇଛି। ଏହି ଅବସରରେ ସ୍ଥାନୀୟ ନନ୍ଦିଘୋଷ ଭବନସ୍ଥିତ ମାଉସୀ ମା’ ମନ୍ଦିରରୁ ଶ୍ରୀଜୀଉଙ୍କ ବିଗ୍ରହଙ୍କୁ ରଥକୁ ପହଣ୍ଡି ବିଜେ କରାଯାଇଥିଲା। ଅପରାହ୍ନ ୨ଟାରେ ଛେରାପହଁରା କରାଯାଇଥିଲା। ଶ୍ରୀଜଗନ୍ନାଥ, ଶ୍ରୀବଳଭଦ୍ର ଓ ଦେବୀ ସୁଭଦ୍ରା ରଥରେ ବିଜେ କରି ମନ୍ଦିର ନିକଟସ୍ଥ ସ୍ଥାନୀୟ ବଜାରରେ ପହଞ୍ଚତ୍ବା ପରେ ଶ୍ରଦ୍ଧାଳୁମାନେ ଭକ୍ତି ଓ ବିଶ୍ୱାସର ସହ ଦର୍ଶନ କରିଥିଲେ। ଶନିବାର ମହାପ୍ରଭୁଙ୍କୁ ସୁନାବେଶ ସଜ୍ଜିତ କରାଯିବାର ସମସ୍ତ ଆୟୋଜନ ଚାଲିଥିବା ସୂଚନା ମିଳିଛି। ସେହିପରି ସାନକୁମାରୀ, ଚମ୍ପାଇଲୋ, ସାଗର ଗାଁ, ଖଉରୁଣୀଠାରେ ମଧ୍ୟ ବାହୁଡ଼ା ଯାତ୍ରା ଅନୁଷ୍ଠିତ ହୋଇଛି।
କୃଷ୍ଣପ୍ରସାଦ-ପୁରୀ ଜିଲା କୃଷ୍ଣପ୍ରସାଦ ବ୍ଲକସ୍ଥିତ ପାରିକୁଦଗଡ଼ଠାରେ ଅନୁଷ୍ଠିତ ବାହୁଡ଼ାଯାତ୍ରାରେ ପାରିକୁଦ ରାଜ ପୁରୋହିତ କମଳ ଚନ୍ଦ୍ର ଦେବତା ଛେରାପହଁରା କରିବା ପରେ ରଥ ଟଣାଯାଇଥିଲା । ଶନିବାର ବଡ ଏକାଦଶୀ ଓ ସୁନାବେଶ ଲାଗି ରଥଯାତ୍ରା ପରିଚାଳନା କମିଟି ତରଫରୁ ସ୍ବତନ୍ତ୍ର ବ୍ୟବସ୍ଥା କରାଯାଇଛି । ନୀଳକଣ୍ଠ ତ୍ରିପାଠୀ, ବାଉରିବନ୍ଧୁ ଦଳେଇ, ଦୁର୍ଯ୍ୟୋଧନ ନାୟକ, ଅଶୋକ କୁମାର ପଣ୍ଡା, ସୁଶାନ୍ତ କୁମାର ଭାରିମଲ୍ଲ ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ । ଶାନ୍ତିଶୃଙ୍ଖଳା ନିମନ୍ତେ କୃଷ୍ଣପ୍ରସାଦ ଥାନା ଆଇଆଇସି ସୁଧୀର କୁମାର ସାହୁଙ୍କ ନେତୃତ୍ୱରେ ୧ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଥିଲା । ସେହିଭଳି ତିତିପ ପଞ୍ଚାୟତସ୍ଥ ଦେଉଳପଡ଼ାଠାରେ ସ୍ବର୍ଗତ ସନାତନ ଦାସଙ୍କ ନେତୃତ୍ୱରେ ୭ ବର୍ଷ ଧରି ଅନୁଷ୍ଠିତ ଉତ୍ସବରେ ବଡ଼ପଣ୍ଡା ଜଗନ୍ନାଥ ଦାଶ, ବାବୁଲି ଦାଶ, ବଳରାମ ଦାଶ, ଲୋଚନ ଦାଶ, ମନୋଜ ମହାପାତ୍ର ଓ କାଳୁ ମହାପାତ୍ର ପ୍ରମୁଖ ସହଯୋଗ କରିଥିଲେ ।
