ଗୁଡଭେଲା,୨୭।୩(ଡି.ଏନ୍.ଏ.): କରୋନା ପାଇଁ ବଲାଙ୍ଗୀର ଜିଲା ତୁଷୁରା ସହରରେ ମାନ୍ଦା ଅବସ୍ଥା ଦେଖିବାକୁ ମିଳୁଛି। ଖାଉଟି ସାମଗ୍ରୀ, ଔଷଧ, ପନିପରିବା ଦୋକାନକୁ ଛାଡ଼ି ଅନ୍ୟ ସମସ୍ତ ଦୋକାନ ବଜାର ବନ୍ଦ କରାଯାଇଛି। ଏହାର ସୁଯୋଗ ନେଇ କିଛି ବ୍ୟବସାୟୀ ବୁଧବାରଠାରୁ ଖାଉଟି ସାମଗ୍ରୀ ଦର ବଢ଼ାଇ ଚାଲିଛନ୍ତି। ଉପଭୋକ୍ତାଙ୍କ ଅଭିଯୋଗ ଅନୁଯାୟୀ, ସୋମବାର ଆଳୁ ଦର କିଲୋ ୨୦ ଟଙ୍କା ଓ ପିଆଜ ଦର କିଲୋ ୨୫ ଟଙ୍କା ଥିବା ବେଳେ ବୁଧବାର ଆଳୁ ୩୦ଟଙ୍କା ଓ ପିଆଜ ୩୫ ଟଙ୍କାକୁ ବୃଦ୍ଧି ପାଇଥିଲା। ସେହିପରି ଚିନି, ଅଟା, ମଇଦା ଆଦି ସାମଗ୍ରୀ କିଲୋ ପ୍ରତି ୫ରୁ ୧୦ ଟଙ୍କା ପର୍ଯ୍ୟନ୍ତ ବୃଦ୍ଧି ପାଇଥିବା ଜଣାପଡ଼ିଛି। ଫଳରେ ଖୁଚୁରା ବ୍ୟବସାୟୀ ଓ ଗ୍ରାହକଙ୍କ ମଧ୍ୟରେ ଦରକୁ ନେଇ ବଚସା ହେଉଥିବା ଦେଖିବାକୁ ମିଳୁଛି। ଏହି ଦରଦାମ୍ ବୃଦ୍ଧିକୁ ନେଇ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
