ଲୋଇସିଂହା,୧୨।୮(ଡି.ଏନ୍.ଏ.): ଗଲା ଦୁଇଦିନ୍ ଧରି ହେଇଥିବାର ବରଷାରେ ବଲାଙ୍ଗୀର ଜିଲା ଲୋଇସିଂହା ବ୍ଲକ ଯୋଗୀସର୍ଡ଼ା ପଁଚେତ୍ ଛେଲବାହାଲ ଗଁାର ସେବକ ବାରିକକଁର ଘର ଭାଂଗି ଯାଇଛେ। ଏନ୍ତାଥି ଅଲପ୍କେ ପରିବାର ଲୋକ୍ ଗୁଟେ ବଡ଼ ବିପଦ୍ରୁ ବରତି ଯାଇଛନ୍। ପରିବାରଟା ଏହେଦେ ଗୁଲଗୁଲା ହେଇ ରହିବାର ଲାଗି ଆଶ୍ରେ ଖୁଜୁଛନ୍।
ସୂଚନା ଅନ୍ସାରେ ଛେଲବାହାଲ ଗଁାର ବୁରୁଧ୍ ସେବକ ବାରିକ। ପରିବାର କହେଲେ ମାଏକିନା ଆର ଗୁଟେ ବଲି ଝି’କେ ନେଇ ତାକର ସଁସାର। ପରିବାରଟା ନିହାତି ଗରିବ୍ ହେଇଥିଲାବେଲେ ୨୦୧୧ ଜନଗଣନା ହିସାବେ ସେବକ୍ ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି ହକ୍ଦାର ଆଏ। ପଁଚେତ୍ରେ ଏସ୍ଇସିସି ତାଲିକାରେ ତାକର ନଁା ରହିଛେ। ହେଲେ ଆଏଜ୍ତକ ସେ ସରକାରୀ ଯୋଜନାରେ ଘରଖଁଡ଼େ ପାଏବାରୁ ବଁଚିତ୍ ହେଇ ରହିଛନ୍। ଗଲା ୭ ତାରିଖ୍ ହେଇଥିବାର ବରଷାରେ କୁଟୁମବସିଆ ଖାଇପିଇ ଶୁଇଥିଲାବେଲେ ଘରର ପଛ୍ଫାଲର କଁାଥି ମାଡ଼ି ବସିଥିଲା। ହେଲେ ସଉଭାଏଗ୍କେ ପରିବାରର କେହି କିଛି ନାଇଁ ହେଇ। କଁାଥି ମାଡ଼ି ବସଲା ଉତାରୁ ଘରେ ଥିବାର ଧାନ, ଚାଉଲ, ଜିନିଷପାତି ସବୁ ବରଷାରେ ଭିଜି ଖରାପ ହେଇଯାଇଛେ। ଆଗ୍କେ ବରଷା ଲାଗି ରହିଲେ ଘରଟା ପୂରା ମାଡ଼ିବସ୍ବାର ବିପଦ୍ ରହିଛେ। ଏନ୍ତା ଅବସ୍ତାରେ ଘରେ ରହିବାର ନିରାପଦ୍ ନୁହେ ବଲି ସେବକ କହିଛନ୍। ଇ ଦୁଖି ପରିବାରକେ ପରଶାସନ ତରଫୁ ସାହାଯ୍ ସଂଗେ ଯେତେ ଜଲଦି ହେବା ଅବାସ ଯୋଜନାରେ ଘରଖଁଡ଼େ ଯୁଗେଇ ଦେବାକେ ସମିତି ସଭ୍ୟ ହେମାଳ ମେଶ୍ୱା ସମେତ ଗଁାବାସୀ ଦାବି କରିଛନ୍।
