ନୂଆଦିଲ୍ଲୀ,୧୭ା୯(ପି.ଟି.): ପୋର୍ଟ ବ୍ଲେୟାରରେ ସୋମବାରଠାରୁ ଭାରତ, ସିଙ୍ଗାପୁର ଓ ଥାଇଲାଣ୍ଡ ନୌସେନା ପକ୍ଷରୁ ତ୍ରିପାକ୍ଷିକ ସମରାଭ୍ୟାସ ଆରମ୍ଭ ହୋଇଛି। ଏହାବ୍ୟତୀତ ମୈତ୍ରୀ ନାମରେ ଭାରତ ଓ ଥାଇଲାଣ୍ଡ ସେନା ମଧ୍ୟରେ ଦ୍ୱିପାକ୍ଷିକ ସମରାଭ୍ୟାସ ମେଘାଳୟର ଉମ୍ରୋଇସ୍ଥିତ ଫରେନ୍ ଟ୍ରେନିଂ ନୋଡ୍ (ଏଫ୍ଟିଏନ୍)ରେ ଆରମ୍ଭ ହୋଇଥିବା ପ୍ରତିରକ୍ଷା ବାହିନୀ ପକ୍ଷରୁ କୁହାଯାଇଛି।
୫ ଦିନିଆ ତ୍ରିପାକ୍ଷିକ ନୌସମରାଭ୍ୟାସରେ ଭାରତୀୟ ଯୁଦ୍ଧଜାହାଜ ରଣବୀର ସହିତ ସିଙ୍ଗାପୁରର ଆର୍ଏସ୍ଏନ୍ ଟେନାସିଅସ୍ ଏବଂ ଥାଇଲାଣ୍ଡର କ୍ରବୁରୀ ସାମିଲ ହୋଇଛି। ଏହାବ୍ୟତୀତ ଅନ୍ୟାନ୍ୟ ଯୁଦ୍ଧ ସରଞ୍ଜାମ ମଧ୍ୟ ଏଥିରେ ସ୍ଥାନ ପାଇଛି। ଏବେ ପୋର୍ଟ ବ୍ଲେୟାର ବନ୍ଦର ଅଞ୍ଚଳରେ ସମରାଭ୍ୟାସ ଆରମ୍ଭ ହୋଇଥିବାବେଳେ ୧୮ରୁ ୨୦ ପର୍ଯ୍ୟନ୍ତ ସମୁଦ୍ର ପର୍ଯ୍ୟାୟ ସମରାଭ୍ୟାସ ଚାଲିବ। ତିନି ଦେଶ ମଧ୍ୟରେ ସାମୁଦ୍ରିକ ସମ୍ପର୍କ ବୃଦ୍ଧି କରିବା ଏହି ସମରାଭ୍ୟାସର ମୁଖ୍ୟ ଉଦ୍ଦେଶ୍ୟ।
