ଭୁବନେଶ୍ୱର,୧।୮ (ବ୍ୟୁରୋ) ପ୍ରତିଷ୍ଠାତା ଭି.ଜି.ସିଦ୍ଧାର୍ଥଙ୍କ ମୃତ୍ୟୁ ଖବର ଶୁଣିବା ପରେ ଦେଶର କିଛି ପ୍ରାନ୍ତରେ ଥିବା ସିସିଡି ଆଉଟଲେଟଗୁଡିକ ବନ୍ଦ ରହିଥିଲା। ଅପରପକ୍ଷରେ ରାଜଧାନୀ ଭୁବନେଶ୍ୱର, କଟକ ସମେତ ରାଜ୍ୟର ଅନ୍ୟ ସ୍ଥାନରେ ଥିବା ଷ୍ଟୋରଗୁଡିକରେ କାରବାର ସ୍ବାଭାବିକ ରହିଥିଲା। ଟ୍ବିନ ସିଟିରେ ପ୍ରାୟ ୧୫ ସିସିଡି ଷ୍ଟୋର ରହିଥିବା ବେଳେ ଏଠାରେ ୧୦୦ କର୍ମଚାରୀ କାର୍ଯ୍ୟ କରୁଥିବା କମ୍ପାନୀର ଜଣେ ଅଧିକାରୀ କହିଛନ୍ତି। ରାଜ୍ୟରେ ଷ୍ଟୋର ସଂଖ୍ୟା ପ୍ରାୟ ୩୦ ହେବ ବୋଲି ଅଧିକାରୀ ଜଣଙ୍କ କହିଛନ୍ତି। ସ୍ଥାନୀୟ ରାମମନ୍ଦିର ନିକଟସ୍ଥ ଷ୍ଟୋରର ଜଣେ ବରିଷ୍ଠ ଅଧିକାରୀ କହିଛନ୍ତି, ପ୍ରତିଷ୍ଠାତାଙ୍କ ନିଖୋଜ ହେବା ଖବର ଶୁଣି ଆଶଙ୍କାରେ ଥିଲୁ। ମଙ୍ଗଳବାରଠାରୁ ସବୁ ଖବର ଟିଭି, ଖବରକାଗଜରୁ ଜାଣିବାକୁ ପାଉଛୁ। ପ୍ରତିଷ୍ଠାତାଙ୍କ ସମ୍ପର୍କରେ କେହି କିଛି ଠିକ୍ ଭାବେ ଜାଣି ପାରୁ ନ ଥିଲେ। ବୁଧବାର ସକାଳେ ଟିଭିରେ ଏବଂ ଇଣ୍ଟରନେଟରୁ ତାଙ୍କର ମୃତ୍ୟୁ ଖବର ଜାଣିବାକୁ ପାଇଲୁ। ଏହାକୁ ନେଇ ମର୍ମାହତ।
ସେହିଭଳି ସ୍ଥାନୀୟ ଭବାନୀ ମଲ୍ରେ କାର୍ଯ୍ୟ କରୁଥିବା ଜଣେ କର୍ମଚାରୀ କହିଛନ୍ତି ଯେ, ପ୍ରତିଷ୍ଠାତାଙ୍କୁ କେବେ ଦେଖିନାହିଁ। ମାତ୍ର ତାଙ୍କ ସମ୍ପର୍କରେ ବହୁତ ଭଲ କଥା ଜାଣିବାକୁ ମିଳିଛି। ଏକ ସାଧାରଣ ପରିବାରରୁ ଆସି ଦେଶ ତଥା ବିଦେଶରେ ଏତେ ବଡ କଫି ଚେନ୍ ସ୍ଥାପନ କରିବାକୁ ସେ ସକ୍ଷମ ହୋଇଥିଲେ। ତାଙ୍କ କଥା ଅନେକ ସମୟରେ ଆଲୋଚନା ହୋଇଥାଏ। ପ୍ରତିଷ୍ଠାତା କଫି ପାନୀୟକୁ ଏକ ଭିନ୍ନ ଢଙ୍ଗରେ ଲୋକଙ୍କ ପାଖକୁ ନେବାକୁ ସକ୍ଷମ ହୋଇଥିଲେ ବୋଲି ଦୁଃଖର ସହ କର୍ମଚାରୀ ଜଣଙ୍କ କହିଛନ୍ତି। ସହରର ବିଭିନ୍ନ ଷ୍ଟୋରରେ ଲୋକମାନଙ୍କର ଯିବା ଆସିବା ସ୍ବାଭାବିକ ରହିଥିବା ବେଳେ କେହି କେହି ଭି.ଜି. ସିଦ୍ଧାର୍ଥଙ୍କ ସମ୍ପର୍କରେ ଆଲୋଚନା କରୁଥିବା ଦେଖାଯାଇଥିଲା। ହେଲେ ବିଭିନ୍ନ ଷ୍ଟୋରର କର୍ମଚାରୀମାନେ ସିଦ୍ଧାର୍ଥଙ୍କ ମୃତ୍ୟୁ ଖବରକୁ ସହଜରେ ଗ୍ରହଣ କରିପାରୁ ନ ଥିବା ଦେଖିବାକୁ ମିଳିଛି।
