ଭୋଗରାଇ, ୧୪।୧୧(ଡି.ଏନ.ଏ.)-ବାଲେଶ୍ୱର ଜିଲା ଭୋଗରାଇ ବ୍ଲକ କମର୍ଦ୍ଦା ଥାନା ଅଧୀନ ମହାଗବ ଅଞ୍ଚଳର ଜଣେ ରୋଗଗ୍ରସ୍ତ ନାବାଳକଙ୍କୁ ଭୂତ ଲାଗିଥିବା କହି ଗୁଣିଆ ଦମ୍ପତି ଜୋତାପୋଡ଼ି ଧୂଆଁ ଦେବା ଓ ନିର୍ଧୁମ୍ ପିଟିବା ଘଟଣା ଭିଡିଓ ଭାଇରାଲ ହେବା ପରେ ସାଧାରଣରେ ତୀବ୍ର ପ୍ରତିକ୍ରୟା ପ୍ରକାଶ ପାଇଛି। କମର୍ଦ୍ଦା ଥାନା ଆଇଆଇସି ପାସ୍କେ ଏକ୍କାଙ୍କ ନେତୃତ୍ୱରେ ପୋଲିସ ଟିମ୍ ଗୁରୁବାର ଭୋର ସମୟରେ ପଶ୍ଚିମବଙ୍ଗ ପଶ୍ଚିମମେଦିନୀପୁର ଜିଲା ମହନପୁର ଥାନା ଅଞ୍ଚଳର ଗୁଣିଆ ଅଜୟ ରାଉଳ ଓରଫ୍ ଚୁଣ୍ଟିଆ (୫୫) ଓ ସ୍ତ୍ରୀ କମଳା ରାଉଳ (୪୫)ଙ୍କୁ ଗିରଫ କରି ଜଳେଶ୍ୱର କୋର୍ଟଚାଲାଣ କରିଛନ୍ତି। କୋର୍ଟରେ ଗୁଣିଆ ଦମ୍ପତିଙ୍କୁ ଜାମିନ ଆବେଦନ ଖାରଜ ହୋଇଯିବାରୁ ସେମାନଙ୍କୁ ଜେଲ ହାଜତକୁ ପଠାଇ ଦିଆଯାଇଛି।
ଏହି ନାବାଳକଙ୍କ ମାତାପିତା ଗରିବ ହୋଇଥିବାରୁ ଡାକ୍ତରଖାନା ନ ଯାଇ ଗ୍ରାମର କ୍ୱାକ୍ଙ୍କଠାରେ ଚିକିତ୍ସା କରିଥିଲେ। ହେଲେ ତାଙ୍କ ଦେହ ଭଲ ନ ହେବାରୁ ଭୂତପ୍ରେତ ଲାଗିଥିବା ସନ୍ଦେହ କରି ଗୁଣିଆ ପାଖକୁ ନେଇଥିଲେ। ସେଠାରେ ଗୁଣିଆ ଦମ୍ପତି ନାବାଳକଙ୍କୁ ରାସ୍ତା କଡ଼କୁ ନେଇ ପୂଜାର୍ଚ୍ଚନା କରିବା ସହିତ ଜୋତା ପୋଡ଼ି ଧୂଆଁଦେବା ଓ ଗଛଡ଼ାଳ ଓ ବାଡ଼ିରେ ନିର୍ଧୁମ୍ ମାରପିଟ କରିଥିଲେ। ଏଥିରେ ନାବାଳକଜଣକ ଅଚେତ ହୋଇପଡିଥିଲେ। ସେଠାରୁ ମାତାପିତା ନାବାଳକଙ୍କୁ ଡାକ୍ତରଙ୍କ ପାଖକୁ ନେଇଥିଲେ।
