ଭୋକ ହେଲେ ମଣିଷଠୁ ଆରମ୍ଭ କରି ଜୀବଜନ୍ତୁ ସମସ୍ତେ ଖାଦ୍ୟ ଖାଆନ୍ତି। ହେଲେ ଉତ୍ତର ପ୍ରଦେଶ, ମୁଜାଫରନଗରର ୪୨ ବର୍ଷୀୟ ନରେଶ କୁମାରଙ୍କୁ ଯେତେବେଳେ ଭୋକଲାଗେ ଓ ପାଖରେ କିଛି ଖାଇବାକୁ ନ ଥାଏ। ସେ କେମିତି ନିଜର ଭୋକ ମେଣ୍ଟାନ୍ତି ଯଦି ଜାଣିବେ ଚକିତ ନ ହୋଇ ରହିପାରିବେ ନାହିଁ। କାହିଁକି ନା ଡାକ୍ତର ବି ଏଭଳି କଥାକୁ ବିଶ୍ୱାସ କରିପାରୁ ନାହାନ୍ତି। ସେ କଭର୍ ନ ଥିବା ତାରକୁ ଧରି ବିଦ୍ୟୁତ୍ ସୁଇଚ୍ ଅନ୍ କରନ୍ତି। ଆଉ ତାଙ୍କ ଦେହରେ ପ୍ରବାହିତ ହୁଏ ବିଦ୍ୟୁତ୍। ଅଧଘଣ୍ଟା ପର୍ଯ୍ୟନ୍ତ ଏଭଳି ରହିବା ପରେ ଯାଇ ତାଙ୍କ ଦେହକୁ ଶକ୍ତି ଆସେ। ଆଉ ସେ ତାଜା ମନେ କରନ୍ତି। ଭୋକସମୟରେ ସେ ୧୧୦୦ ଭୋଲ୍ଟ ବିଦ୍ୟୁତ୍ ଛୁଇଁ ଶକ୍ତି ପାଆନ୍ତି। ୫ଟି ସନ୍ତାନର ବାପା ନରେଶ ସରକାରୀ ହସ୍ପିଟାଲରେ ପୋଷ୍ଟମର୍ଟମବେଳେ ଡାକ୍ତରଙ୍କୁ ସାହାଯ୍ୟ କରିବା କାମ କରନ୍ତି। ତେବେ ନିଜ ଭିତରେ ଥିବା ଏହି ଅଦ୍ଭୁତ ବିଶେଷତା ସମ୍ପର୍କରେ ସେ ୬ ବର୍ଷ ପୂର୍ବେ ଜାଣିବାକୁ ପାଇଲେ। ଯେତେବେଳେ ସେ ହଠାତ୍ ଜୀବନ୍ତ ବିଦ୍ୟୁତ୍ ସଂସ୍ପର୍ଶରେ ଆସିଥିଲେ। ହେଲେ ତାଙ୍କର କୌଣସି କ୍ଷତି ହେଲାନାହିଁ। ତା’ପରଠାରୁ ତାଙ୍କ ଦୁନିଆ ବଦଳିଗଲା। ବିଦ୍ୟୁତ୍ ପ୍ରତି ତାଙ୍କର ଭୟ ରହିଲା ନାହିଁ। ସବୁଠୁ ଚର୍ଚ୍ଚାର ପାତ୍ର ପାଲଟିଗଲେ। ହେଲେ ତାଙ୍କ ପରିବାର ଲୋକେ ଭୟ କରନ୍ତି ତାଙ୍କର ଏହି ଅଦ୍ଭୁତ ଶକ୍ତି ପାଇଁ। ନିଜକୁ ବି ସେମାନେ ସୁରକ୍ଷିତ ମନେକରନ୍ତି ନାହିଁ।
