ରତ୍ନଗିରି,୧୪-୧(ଡିଏନ୍ଏ):ମଞ୍ଚରେ ଓ ମଞ୍ଚ ପାଇଁ ବଞ୍ଚୁଥିବା ମଣିଷ ହେଉଛନ୍ତି ବରୀ ବ୍ଲକ ଅଧୀନ ବାଲିବିଲି ଗ୍ରାମର ଦୁର୍ଯ୍ୟୋଧନ ପରିଡା(୬୪)। ପିଲାଟି ଦିନରୁ ତୁଳସୀ ଦୁଇପତ୍ରରୁ ବାସିବା ଭଳି ଅଭିନୟ କ୍ଷେତ୍ରରେ ତାଙ୍କ ଦକ୍ଷତା ପ୍ରସ୍ଫୁଟିତ ହୋଇଥିଲା। ମଞ୍ଚରେ ଅଭିନୟ କରିବା ତାଙ୍କର ନିଶା ପାଲଟିଥିଲା। ଶିକ୍ଷକ ନ ହୋଇ ବି ନିଜ ଭିତରେ ଥିବା ଅନୁଭୂତି ଓ ମଞ୍ଚ ପରିଚାଳନାର ପ୍ରଚେଷ୍ଟା ତାଙ୍କୁ ଦିରା ମାଷ୍ଟ୍ରେ ଭାବେ ବରୀ ଅଞ୍ଚଳରେ ପରିଚୟ ଦେଇଛି। ମଞ୍ଚ ନାଟକରେ ଅଭିନୟ କରୁଥିବା କଳାକାରଙ୍କୁ ପରିବାର ଲୋକଙ୍କ ଭଳି ଆପଣେଇବା ସହିତ ନିର୍ଭୁଲ ଭାବେ ଅଭିନୟ କରିବାକୁ ପ୍ରବର୍ତ୍ତାଇ ଥାଆନ୍ତି। ଯାହାକି ତାଙ୍କର ପ୍ରଥମ କର୍ତ୍ତବ୍ୟ ବୋଲି ସେ ଧରିନେଇଥାନ୍ତି। ସେ ରୋଗାଗ୍ରସ୍ଥ ସତ୍ତ୍ୱେ ମଞ୍ଚ ନାଟକରେ ଅଭିନୟ କରିବା ଓ ନିର୍ଦ୍ଦେଶନା ଦେବାକୁ ଏବେବି ତାଙ୍କ ମନରେ ପ୍ରବଳ ଉକତ୍ଣ୍ଠା ରହିଥିବା ଦେଖିବାକୁ ମିଳିଛି। କୋଡିଏ ବର୍ଷ ବୟସରୁ ନବଜ୍ୟୋତି ନାଟ୍ୟ ସଂସଦ ଗଠନ କରି ସ୍ଥାନୀୟ ଯୁବକଙ୍କୁ ନେଇ ଏକ କଳା ପରିଷଦ ଗଠନ କରିବା ଓ ପରବର୍ତ୍ତୀ ଅବସ୍ଥାରେ ବଜ୍ରକାଳୀ ନାଟ୍ୟ ସଂସଦ, ସବୁଜ ସାଥୀ କଳା ପରିଷଦ, ଜୟ ଦୂର୍ଗାନାଟ୍ୟ ସଂସଦ, ମା’ ବିଶୁନେଇ କଳା ପରିଷଦ ଭଳି ଅନେକ ନାଟ୍ୟନୁଷ୍ଠାନ ସୃଷ୍ଟି କରିବା କ୍ଷେତ୍ରରେ ତାଙ୍କର ଅଦମ୍ୟ ପ୍ରଚେଷ୍ଟା ଆଜି ବି ବିଭିନ୍ନ ମଞ୍ଚରେ ଅଭିନୟ କରୁଥିବା କଳାକାରଙ୍କ ହୃଦୟରେ ତାଙ୍କ ପାଇଁ ଏକ ସ୍ବତନ୍ତ୍ର ସ୍ଥାନ ସୃଷ୍ଟି କରିଛି। ଦୀର୍ଘ ୪୨ ବର୍ଷର କଳାକାର ଜୀବନ ଭିତରେ ତାଙ୍କ ଦ୍ୱାରା ସୃଷ୍ଟି ହୋଇଥିବା ଅନେକ କଳାକାର ସଫଳତାର ସହ ଅଭିନୟ କରି ପ୍ରଶଂସିତ ହେବା ତାଙ୍କୁ ବହୁ ଆନନ୍ଦ ଦିଏ ବୋଲି ସେ ପ୍ରକାଶ କରିଛନ୍ତି। ଜୀବନର ଶେଷ ନିଃଶ୍ୱାସ ପର୍ଯ୍ୟନ୍ତ ମଞ୍ଚ କଳାକୁ ବଞ୍ଚାଇ ରଖିବା କ୍ଷେତ୍ରରେ ସେ ପ୍ରତିଶ୍ରୁତିବଦ୍ଧ ବୋଲି କୁହନ୍ତି। ରାଜ୍ୟ ସରକାର କଳାକାରଙ୍କୁ ପ୍ରୋସତ୍ାହନ ପାଇଁ କଳାକାର ଭତ୍ତା ପ୍ରଦାନ କରୁଥିବାବେଳେ ତାଙ୍କ ପ୍ରତି ସରକାରଙ୍କ ଦୃଷ୍ଟି ନ ପଡିବା ଅତ୍ୟନ୍ତ ଦୁଃଖ ଓ ପରିତାପର ବିଷୟ ବୋଲି କ୍ଷୋଭର ସହ ପ୍ରକାଶ କରିଛନ୍ତି।
