ଆନନ୍ଦପୁର,୮।୧୦(ସ୍ବ.ପ୍ର.)- ଖାଇବାକୁ ଗଣ୍ଡେ ପାଇଲୁନି କି ପିନ୍ଧିବାକୁ ଖଣ୍ଡେ ପାଇଲୁନି। ଆମ ପୁରୁଷମାନେ ମଦ ପିଇ ମାତାଲ ହେଲେ। ପୋଲିସକୁ ଜଣାଇଲୁ ହେଲେ ପୋଲିସ କହିଲା ଦଶହରା ସରୁ ଆମେ ଦେଖିବୁ। ଶେଷରେ ବାଧ୍ୟ ହୋଇ ମଦ ଦୋକାନ ଏବଂ ମଦୁଆଙ୍କୁ ସାବାଡ଼ କରିବା ଲାଗି ଅଣ୍ଟା ଭିଡିଥିବା କହିଛନ୍ତି ଆନନ୍ଦପୁର ପୌରପରିଷଦ ୧୦ ନଂ. ଓ୍ବାର୍ଡ ହରିଜନ ସାହିର ମହିଳାମାନେ। ସୋମବାର ସନ୍ଧ୍ୟାଠାରୁ ବିଳମ୍ବିତ ରାତି ପର୍ଯ୍ୟନ୍ତ ହାତରେ ବାଡି ଓ ଟର୍ଚ୍ଚ ଧରି ବିଭିନ୍ନ ସ୍ଥାନରେ ମହିଳାମାନେ ଚଢାଉ କରିଥିଲେ। କେତେକ ସ୍ଥାନରୁ ଦେଶୀ ମଦ ପାଉଚ ମଧ୍ୟ ଜବତ କରିଥିଲେ। ଦୁର୍ଗା ପୂଜା ପାଇଁ ଝିଅ ବୋହୁମାନେ ସାଜ ସଜା ହୋଇ ପୂଜାମଣ୍ଡପ ବୁଲୁଥିବାବେଳେ ଏହି ହରିଜନ ସାହିର ମହିଳାମାନେ ମଦ କାରବାରକୁ ରୋକିବା ପାଇଁ ଅଭିନବ ଉପାୟ ଅବଲମ୍ବନ କରିବା ଘଟଣା ଚର୍ଚ୍ଚାର ବିଷୟ ହୋଇଛି। ମଦ ପ୍ରଭାବରେ ଅନେକ ଘର ପରିବାର ଉଜୁଡ଼ିି ଯାଉଥିବାବେଳେ ଲୋକମାନଙ୍କର ଆର୍ଥିକ ସ୍ଥିତି ଦୁର୍ବଳ ହେବାରେ ଲାଗିଛି। ହେଲେ ପ୍ରଶାସନ ମଦ କାରବାରକୁ ରୋକିବା ପାଇଁ କୌଣସି ପଦକ୍ଷେପ ନେଉନଥିବା ମହିଳାମାନେ ଅଭିଯୋଗ କରିଛନ୍ତି।
