ନୂଆଦିଲ୍ଲୀ,୯ା୫(ପି.ଟି.): ଲକ୍ଡାଉନ୍ ଯୋଗୁ ମଦ ବିକ୍ରି ବନ୍ଦ ଥିବାବେଳେ ଗତ ୪ ତାରିଖରେ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଏହାକୁ ସସର୍ତ୍ତ ଅନୁମତି ମିଳିଥିଲା। ଫଳରେ ୪୦ ଦିନ ଧରି ବିକ୍ରି ବନ୍ଦ ଥିବାରୁ ମଦ ଦୋକାନଗୁଡ଼ିକ ଆଗରେ ନାହିଁ ନ ଥିବା ଭିଡ଼ ଦେଖାଦେଇଛି। ସାମାଜିକ ଦୂରତ୍ୱ କଥାକୁ ଗ୍ରାହକମାନେ ଭୁଲିଯାଇଥିବାରୁ ସଂକ୍ରମଣ ବଢ଼ିବା ଆଶଙ୍କା ସୃଷ୍ଟି ହୋଇଛି। ତେଣୁ ଅନ୍ଲାଇନ୍ରେ ମଦ ବିକ୍ରି ତଥା ହୋମ୍ ଡେଲିଭରି ପାଇଁ ରାଜ୍ୟ ସରକାରମାନେ ବିଚାର କରନ୍ତୁ ବୋଲି ଶୁକ୍ରବାର ସୁପ୍ରିମକୋର୍ଟ କହିଛନ୍ତି।
ଗ୍ରାହକଙ୍କୁ ସିଧାସଳଖ ମଦ ବିକ୍ରି ଯୋଗୁ ସାମାଜିକ ଦୂରତ୍ୱ ନିୟମ ଉଲ୍ଲଂଘନ ହେଉଥିବାରୁ ସ୍ବରାଷ୍ଟ୍ର ମନ୍ତ୍ରଣାଳୟର ମେ’ ୧ ତାରିଖ ଗାଇଡ୍ଲାଇନ୍କୁ ଚ୍ୟାଲେଞ୍ଜ କରି ସର୍ବୋଚ୍ଚ ଅଦାଲତରେ ଜନସ୍ବାର୍ଥ ମାମଲା ଦାଏର ହୋଇଥିଲା। ଜଷ୍ଟିସ୍ ଅଶୋକ ଭୂଷଣ, ସଞ୍ଜୟ କିଷନ କୌଲ ଏବଂ ବି.ଆର୍. ଗଭାଇଙ୍କୁ ନେଇ ଗଠିତ ଖଣ୍ଡପୀଠ ଭିଡିଓ କନ୍ଫରେନ୍ସ ମାଧ୍ୟମରେ ପିଟିଶନର ଶୁଣାଣି କରିଥିଲେ। ଆବେଦନକାରୀ ଗୁରୁସ୍ବାମୀ ନଟରାଜଙ୍କ ପକ୍ଷରୁ ଆଇନଜୀବୀ ସାଇ ଦୀପକ ଖଣ୍ଡପୀଠଙ୍କୁ କହିଥିଲେ, ଲକ୍ଡାଉନ ସମୟରେ ଦୋକାନରେ ମଦ ବିକ୍ରି କରା ନ ଯାଇ ଏହାର ହୋମ୍ ଡେଲିଭରି କିମ୍ବା ଅନ୍ଲାଇନ୍ ବିକ୍ରି ଲାଗି ରାଜ୍ୟ ସରକାରମାନେ ଅନୁମତି ଦେବାକୁ ନିର୍ଦ୍ଦେଶ ଦିଆଯାଉ। ସେ କହିଥିଲେ ଦେଶରେ ୭୦ ହଜାର ମଦ ଦୋକାନ ରହିଛି। ଗତ ୪ ଦିନରେ ୫ କୋଟିରୁ ଅଧିକ ଲୋକ ମଦ କିଣିଲେଣି। ତେବେ ମଦ ଦୋକାନ ଆଗରେ ସାମାଜିକ ଦୂରତ୍ୱ ରକ୍ଷା କରାଯାଉ ନ ଥିବାରୁ କୋଭିଡ୍-୧୯ ସଂକ୍ରମଣ ବଢ଼ିବା ଆଶଙ୍କା ପ୍ରକାଶ ପାଇଛି। ଏଭଳି ମଦ ବିକ୍ରି ହେଲେ ଦୀର୍ଘଦିନର ଲକ୍ଡାଉନ ଯୋଗୁ ଯେଉଁ ସୁଫଳ ମିଳିଥିଲା, ତାହା ବେକାର ହୋଇଯିବ ବୋଲି ଦୀପକ କହିଥିଲେ।
