ଦାରିଙ୍ଗବାଡ଼ି,୬।୭(ଡି.ଏନ.ଏ) -ଦାରିଙ୍ଗବାଡ଼ି ବ୍ଲକ ଅଞ୍ଚଳରେ ତୁହାକୁ ତୁହା ଝିପିଝିପି ବର୍ଷା ଲାଗି ରହିଛି। ଫଳରେ ପକ୍କାରାସ୍ତା ନ ଥିବା ବିଭିନ୍ନ ଗ୍ରାମବାସୀଙ୍କ ସମସ୍ୟା ବଢିଯାଇଛି। ତାଜୁଙ୍ଗିଆ ପଞ୍ଚାୟତକୁ ଥିବା କଚ୍ଚାରାସ୍ତା କର୍ଦ୍ଦମାକ୍ତ ହୋଇଯାଇଛି। ଫଳରେ ଗାଡ଼ିମଟର ଯିବା ତ ଦୂରର କଥା ପାଦରେ ଚାଲି ଯିବା ମଧ୍ୟ ମୁସ୍କିଲ ହୋଇପଡୁଥିବା କହିଛନ୍ତି ଗ୍ରାମର ଏଲିୟ ନାୟକ। ରାସ୍ତାରେ କାଦୁଅ ଯୋଗୁ ରୋଗୀଙ୍କୁ ସ୍ବାସ୍ଥ୍ୟକେନ୍ଦ୍ର ନେବା ମୁସ୍କିଲ ହୋଇପଡ଼ିଛି। ଖଟିଆରେ ବୋହିନେବା ଛଡ଼ା ଆଉ କିଛି ଉପାୟ ନାହିଁ। ଗ୍ରାମକୁ ସବୁଦିନିଆ ଭଲ ରାସ୍ତା ନ ଥିବାରୁ ଆଜି ପର୍ଯ୍ୟନ୍ତ କୌଣସି ଯାତ୍ରିବାହୀ ବସ ଚଳାଚଳ କରୁନାହିଁ। କେବଳ ଅଟୋ ଯାତାୟତ କରୁଥିବା ବେଳେ ଏବେ କାଦୁଅ ଯୋଗୁ ତାହା ମଧ୍ୟ ଯାଇପାରୁନାହିଁ। ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ ରାସ୍ତା ସମ୍ପ୍ରସାରଣ କରାଯାଉଥିବା ବେଳେ ଏବେ ଏକାଧିକ ସ୍ଥାନରେ କଲଭର୍ଟ ନିର୍ମାଣ ଚାଲିଛି। ତାହା ମଧ୍ୟ ଅତି ନିମ୍ନ ମାନର କାର୍ଯ୍ୟ କରାଯାଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ପ୍ରଥମ ପର୍ଯ୍ୟାୟରେ ମହାଗୁଡ଼ି ଠାରୁ ତାଜୁଙ୍ଗିଆ ରାସ୍ତା ମାତ୍ର ୩ କି.ମି ପାଇଁ ୮୦ ଲକ୍ଷ ଟଙ୍କା ଅନୁଦାନ ରହିଛି। ଘାଟି କଟାଯିବା ଏବଂ ପକ୍କାରାସ୍ତା ନିର୍ମାଣ ପାଇଁ ଆହୁରି ଅଧିକା ଅର୍ଥର ଆବଶ୍ୟକତା ରହିଥିବା ବିଭାଗ ପକ୍ଷରୁ କୁହାଯାଇଛି। କଲଭର୍ଟ ନିର୍ମାଣ ଯୋଗୁ ନୂଆ ମାଟି ଖୋଳା ଯାଇଥିବାରୁ ବର୍ଷାପରେ କାଦୁଅ ହୋଇଛି। ସେଠାରେ ଅଧିକ ଗୋଡି ଥିବା ମୋରମ ପକାଇବାକୁ ଠିକାଦାରଙ୍କୁ ନିର୍ଦ୍ଦେଶ ଦିଆଯାଇଥିବା ଗ୍ରାମ୍ୟ ଉନ୍ନୟନ ବିଭାଗ ଦାରିଙ୍ଗବାଡ଼ି ସେକ୍ସନ ସହକାରୀ ନିର୍ବାହୀ ଯନ୍ତ୍ରୀ ମନ୍ମଥ ସୁବୁଦ୍ଧି କହିଛନ୍ତି। କଲଭର୍ଟ ନିମ୍ନମାନର କାର୍ଯ୍ୟ ସମ୍ପର୍କରେ ସେ ତଦନ୍ତ କରିବେ ବୋଲି କହିଛନ୍ତି।
ଯେ, ତାଜୁଙ୍ଗିଆ ପଞ୍ଚାୟତକୁ ସବୁଦିନିଆ ରାସ୍ତା ନିର୍ମାଣ ଦାବିରେ ୨୦୧୮ ନଭେମ୍ବର ୮ରୁ ତାଜୁଙ୍ଗିଆବାସୀ ଅନେକଥର ଆନ୍ଦୋଳନ କରିବା ସହ ଦାରିଙ୍ଗବାଡ଼ି ଠାରୁ ବ୍ରାହ୍ମଣୀଗାଁ ରାସ୍ତା ଅବରୋଧ କରିଥିଲେ। ପରେ ଜିଲା ପ୍ରଶାସନ ସହ ଗ୍ରାମବାସୀଙ୍କ ଆଲୋଚନା ହୋଇ ରାସ୍ତା ସମ୍ପ୍ରସାରଣ ପ୍ରତିଶ୍ରୁତି ମିଳିଥିଲା। ଏବେ ଗ୍ରାମ୍ୟ ଉନ୍ନୟନ ବିଭାଗ ଏହି ରାସ୍ତା ସମ୍ପ୍ରସାରଣ କରୁଛି।
