ମହାପ୍ରଭୁଙ୍କର ନୀଳଚକ୍ରରେ ଉଠୁଥିବା ପତିତପାବନ ବାନା ବର୍ଷ ସାରା ତିଆରି ହୁଏ ଆଉ ବନ୍ଧା ମଧ୍ୟ ହୋଇଥାଏ। କେତେଜଣ ଭକ୍ତ ନିଜର ମାନସିକ ପୂରଣ ପାଇଁ ଏହି ବାନା ଯାଚିଥାଆନ୍ତି। ମୁଖ୍ୟ ବାନା ବ୍ୟତୀତ ଆହୁଛି ଛୋଟ ବଡ (ମୁଖ୍ୟ ବାନାଠାରୁ କମ୍ ଲମ୍ବ ବିଶିଷ୍ଟ) ବାନା ତିଆରି ହୁଏ। ଏହାକୁ ‘ଧ୍ୱଜା ପତାକା ସେବା’ କହନ୍ତି । ଆମ ପରିବାର କାହିଁ କେତେ ପିଢ଼ି ହେଲା ଏହି ସେବା କାର୍ଯ୍ୟ କରିଆସୁଛନ୍ତି। ଏହି ବାନା ତିଆରି କରୁଥିବା ମୁଖ୍ୟ ଦରଜୀଙ୍କୁ ‘ଦରଜୀ ସର୍ଦ୍ଦାର’ କୁହାଯାଏ। ଆଉ ଏହି ଦାୟିତ୍ୱ ଗତ ୨୩ ବର୍ଷ ଧରି ବେଶ୍ ସୁଚାରୁ ରୂପେ ନିର୍ବାହ କରିଆସୁଛି। ବାନା ତିଆରି କରିବା ବ୍ୟତୀତ ରଥ କନା ସିଲେଇ, ମହାପ୍ରଭୁଙ୍କ ଶେଯ, ମାଣ୍ଡି କାମ ମଧ୍ୟ ଦରଜୀ ସର୍ଦ୍ଦାରଙ୍କ ମାଧ୍ୟମରେ ସମ୍ପାଦିତ ହୁଏ। ପତିତପାବନ ବାନା ଏବଂ ଅନ୍ୟାନ୍ୟ ବାନା କେବଳ ଆମ ଘର ଲୋକ ହିଁ ତିଆରି କରନ୍ତି। ସେମାନଙ୍କ ଭିତରେ ଜଣେ ମୁଖ୍ୟ (ଦରଜୀ ସର୍ଦ୍ଦାର) ବ୍ୟତୀତ ଆଉ ୧୮ ଜଣ ଏହି କାମରେ ନିୟୋଜିତ ଅଛନ୍ତି। ଏହି କାମ ଦିନ ରାତି ଚାଲିଥାଏ। ଆମର ଘରେ ଦିନକୁ ପ୍ରାୟ ୩୦୦-୪୦୦ ପତାକା ତିଆରି ହୋଇଥାଏ। ମନ୍ଦିରରେ ଯେତେ ପତାକା ଆବଶ୍ୟକ ହୁଏ ସେଗୁଡିକୁ କେବଳ ଦରଜୀ ସର୍ଦ୍ଦାରଙ୍କର ଘରୁ ହିଁ ଯୋଗାଇ ଦିଆଯାଏ। କେତେଜଣ ଭକ୍ତ ନିଜର ମନସ୍କାମନା ପୂରଣ ହେବା ଲାଗି ନୀଳଚକ୍ରରେ ବାନା ବାନ୍ଧିବାକୁ ଯାଚିଥାଆନ୍ତି। ସେମାନେ କେବଳ ଆମରି ପାଖରୁ ସେହି ବାନାଗୁଡିକୁ ନେଇ ମନ୍ଦିରର କାର୍ଯ୍ୟାଳୟରେ ଡିପୋଜିଟ କରନ୍ତି। ତା’ପରେ ତାହା ଚୂନରା ସେବକଙ୍କ ନିକଟକୁ ଯାଇଥାଏ ଏବଂ ସେମାନେ ସେଗୁଡିକୁ ନେଇ ବାନ୍ଧନ୍ତି। ଏ ନେଇ ଅନୁଭୂତି ତ ନିଶ୍ଚୟ ନିଆରା। ମହାପ୍ରଭୁଙ୍କ କାମ ହିଁ ମୋ ପାଇଁ ବିଭୂତି। ତାଙ୍କର କାମ କରିବା ବେଳେ ମନ ସବୁବେଳେ ଆନନ୍ଦିତ ଥାଏ।“
