ମୁମ୍ବାଇ,୧୯।୧୦: ମହାରାଷ୍ଟ୍ର ବିଧାନସଭା ନିର୍ବାଚନ ଅକ୍ଟୋବର ୨୧ରେ ହେବ। ୨୮୮ ଆସନ ପାଇଁ ନିର୍ବାଚନ ମଇଦାନରେ ୩ ହଜାର ୨ଶହ ୩୭ ପ୍ରାର୍ଥୀ ରହିଛନ୍ତି। ନିର୍ବାଚନ ଲଢୁଥିବା ସବୁଠାରୁ ଗରିବ ପ୍ରାର୍ଥୀଙ୍କ ନାମ ହେଉଛି ଭେଙ୍କଟେଶ୍ୱର ମହାସ୍ବାମୀ। ତାଙ୍କ ପାଖରେ କୌଣସି ସମ୍ପତ୍ତି ନାହିଁ। ନଗଦ ଆକାରରେ ତାଙ୍କ ପାଖରେ ଶୂନ ଟଙ୍କା ରହିଛି ବୋଲି ସେ ସତ୍ୟପାଠରେ ଦର୍ଶାଇଛନ୍ତି। ସେ ହିନ୍ଦୁସ୍ତାନ ଜନତା ପାର୍ଟିର ସଦସ୍ୟ। ଅପରପକ୍ଷରେ ନିର୍ଦ୍ଦଳୀୟ ପ୍ରାର୍ଥୀ ମିନାତୈ ଯାଦବ ଖିଳାରେ ଏବଂ ଆକାଶ ପ୍ରକାଶ ପାଟିଲଙ୍କ ପାଖରେ ଯଥାକ୍ରମେ ୪ ଶହ ଏବଂ ୫ ଶହ ଟଙ୍କା ରହିଛି। ସେହିପରି ନିର୍ବାଚନ ଲଢୁଥିବା ସବୁଠାରୁ ଧନୀ ପ୍ରାର୍ଥୀ ହେଉଛନ୍ତି ଭାଜପାର ପରାଗ ଶାହ। ତାଙ୍କ ସମ୍ପତ୍ତି ପରିମାଣ ୫ ଶହ କୋଟି ରହିଛି। ସେହିପରି ଦ୍ୱିତୀୟ ଧନୀ ପ୍ରାର୍ଥୀ ହେଉଛନ୍ତି ଭାଜପା ପ୍ରାର୍ଥୀ ମଙ୍ଗଳ ପ୍ରଭାତ ତାଙ୍କ ପାଖରେ ୪ ଶହ ୪୧ କୋଟି ଟଙ୍କାର ସମ୍ପତ୍ତି ରହିଛି। ତୃତୀୟ ଧନୀ ପ୍ରାର୍ଥୀ ଭାବେ କଂଗ୍ରେସର ସଞ୍ଜୟ ଜଗତାପ ନିର୍ବାଚନ ଲଢୁଛନ୍ତି। ତାଙ୍କର ସମ୍ପତ୍ତି ପରିମାଣ ୨ ଶହ ୪୫ କୋଟି ଟଙ୍କା ଥିବା ସତ୍ୟପାଠରେ ଦର୍ଶାଯାଇଛି।
