କେନ୍ଦୁଝର, ୧ା୪ (ସ୍ବ.ପ୍ର.): ମହାମାରୀ କରୋନା ଭୂତାଣୁ ସଂକ୍ରମଣ ରୋକିବା ପାଇଁ ଲକ୍ଡାଉନ୍ ଘୋଷଣା ପରେ ଜିଲା ଓ ରାଜ୍ୟ ସୀମା ସିଲ କରାଯାଇ ଯାତାୟାତ ଉପରେ କଟକଣା ଲାଗୁ କରାଯାଇଛି। ଏଣୁ ଯେଉଁ ରାଜ୍ୟରେ ଅନ୍ୟ ରାଜ୍ୟର ଲୋକ, ଶ୍ରମିକ ଅଟକି ରହିଯାଇଛନ୍ତି ସେହି ରାଜ୍ୟର ସରକାର ସେମାନଙ୍କୁ ମାଗଣା ଖାଦ୍ୟ ଓ ରହିବା ବ୍ୟବସ୍ଥା କରିବାକୁ ଆଦେଶ ହୋଇଛି। କିନ୍ତୁ ଠିକ୍ ଭାବେ ଖାଦ୍ୟ ମିଳୁନାହିଁ ବୋଲି ଅଟକି ଥିବା ଶ୍ରମିକମାନେ ଅଭିଯୋଗ କରିଛନ୍ତି। କେନ୍ଦୁଝର ଜିଲାରେ ଅଟକି ରହିଥିବା ପଶ୍ଚିମବଙ୍ଗ ସମେତ ଅନ୍ୟ ରାଜ୍ୟର ଶ୍ରମିକ, ମିସ୍ତ୍ରୀ, ବ୍ୟବସାୟୀ ମାନେ ଏଭଳି ଆଦେଶ ଯୋଗୁଁ ଆଶ୍ୱସ୍ତ ହୋଇଛନ୍ତି। ତେବେ କେନ୍ଦୁଝର ସହରର ବିଭିନ୍ନ ସାହିରେ ଅଟକି ରହିଥିବା ପଶ୍ଚିମବଙ୍ଗର ନିର୍ମାଣ ଶ୍ରମିକମାନଙ୍କୁ ଦୁଇ ଦିନ ହେଲା ଖାଇବାକୁ ମିଳୁ ନ ଥିବାରୁ ଭୋକରେ ରହୁଥିବା ଅଭିଯୋଗ ହେଉଛି। ତନ୍ମଧ୍ୟରୁ ଜଗନ୍ନାଥପୁର (ଭାଲୁକିପାତଳା ) ସାହିର କୋର୍ଟ ପଛରେ ୧୬ ଜଣ, ଡିଏଭି ପବ୍ଲିକ ସ୍କୁଲ ନିକଟରେ (ଲେନ ୫)ରେ ୧୦ ଜଣ, ଲେନ ୨ ରେ ୧୦ ଜଣ, ସିରାଜଉଦ୍ଦିନ ଛକ ନିକଟ ଧୋବାଡିହା ସାହିରେ ୪ଜଣ ରହୁଥିବା ଜଣାପଡିଛି। ଲକ ଡାଉନ ଘୋଷଣା ହେବା ପରେ ସେମାନେ ବାହାରକୁ ବାହାରି ପାରୁ ନାହାନ୍ତି। ଏଣୁ ଅର୍ଥ ସାଙ୍ଗକୁ ଖାଦ୍ୟ ସମସ୍ୟା ମଧ୍ୟ ହେଉଛି। ଏଣୁ ସେମାନଙ୍କୁ ତୁରନ୍ତ ଖାଦ୍ୟ ଯୋଗାଇଦେବାକୁ ଆଇନଜୀବୀ ସୁରଜ ମହାପାତ୍ର, ଦୈତାରୀ ଆପଟ ଜିଲା ପ୍ରଶାସନଙ୍କୁ ଅନୁରୋଧ କରିଛନ୍ତି। ଏନେଇ ଜିଲାପାଳଙ୍କୁ ଜଣାଇ ପଦକ୍ଷେପ ନେବାକୁ କୁହାଯାଇଛି। ତେବେ ଏଭଳି ଶ୍ରମିକଙ୍କ ଚିହ୍ନଟ ଶ୍ରମ ବିଭାଗ କରୁଥିବା ବେଳେ ପୌରପାଳିକା ପକ୍ଷରୁ ଖାଦ୍ୟ ବା ରାଶନ ସାମଗ୍ରୀ ଯୋଗାଇ ଦିଆଯାଉଛି ବୋଲି ଜିଲା ଶ୍ରମ ଅଧିକାରୀ ଅଜୟ ପ୍ରଧାନ କହିଛନ୍ତି।
