ଢେଙ୍କାନାଳ ଅଫିସ, ୨୭ା୯-ସ୍ବାସ୍ଥ୍ୟକେନ୍ଦ୍ର ଏବଂ ଆର୍ଟିଓ କାର୍ଯ୍ୟାଳୟକୁ ୧୫ଦିନ ମଧ୍ୟରେ ଦଲାଲମୁକ୍ତ କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିର୍ଦ୍ଦେଶ ଦେବା ପରେ ପ୍ରକାଶ ପାଇଛି ପ୍ରଶାସନିକ ତତ୍ପରତା। ତଦନୁଯାୟୀ ଗୁରୁବାର ମଧ୍ୟାହ୍ନରେ ଢେଙ୍କାନାଳ ଟାଉନ ଥାନା ପୋଲିସ ପକ୍ଷରୁ ଆଞ୍ଚଳିକ ପରିବହନ ଅଧିକାରୀଙ୍କ କାର୍ଯ୍ୟାଳୟରେ ଚଢ଼ାଉ କରାଯାଇଛି। ଥାନାଧିକାରୀ ଜ୍ଞାନରଞ୍ଜନ ସାମଲ, ଆଞ୍ଚଳିକ ପରିବହନ ଅଧିକାରୀ ଦାୟିତ୍ୱରେ ଥିବା ମୋଟରଯାନ ନିରୀକ୍ଷକ ଶ୍ରୀବତ୍ସ ଦଳେଇ ଅଫିସ୍ର ବିଭିନ୍ନ ପ୍ରକୋଷ୍ଠ ଏବଂ କାଉଣ୍ଟରରେ ଯାଞ୍ଚ କରିଥିଲେ। ଯାନବାହନ ପଞ୍ଜୀକରଣ ଲାଗି ଲାଇନରେ ଛିଡ଼ା ହୋଇଥିବା ଲୋକଙ୍କୁ ଦଲାଲଙ୍କ କବଳରେ ନ ପଡ଼ିବାକୁ ସଚେତନ କରାଯାଇଥିଲା। କାର୍ଯ୍ୟାଳୟରେ ଦଲାଲ ସାଜି ଲୋକଙ୍କୁ ଶୋଷଣ କରୁଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଗାଡ଼ି ମାଲିକଙ୍କୁ ପ୍ରଲୋଭିତ କରି ଅର୍ଥ ଆଦାୟ କରୁଥିବା ଏବଂ ହଇରାଣ ହରକତ କରୁଥିବା ମଧ୍ୟସ୍ଥଙ୍କ ବିଷୟରେ ସୂଚନା ଦେବାକୁ ଥାନାଧିକାରୀ ଆହ୍ବାନ ଦେଇଛନ୍ତି। ଏ ସମ୍ପର୍କରେ ଭାରପ୍ରାପ୍ତ ଆରଟିଓ କୁହନ୍ତି, ଦଲାଲ ଏବଂ ମଧ୍ୟସ୍ଥ କାର୍ଯ୍ୟ ରୋକିବାକୁ ଉଦ୍ୟମ କରାଯିବା ପରେ କେତେଜଣ ବ୍ୟକ୍ତି କାର୍ଯ୍ୟାଳୟର କର୍ମଚାରୀଙ୍କୁ ଫୋନ୍ରେ ଧମକଚମକ ଦେଉଛନ୍ତି। ଏ ନେଇ ପୋଲିସର ଦୃଷ୍ଟି ଆକର୍ଷଣ କରାଯାଇଛି ।
