ଭୁବନେଶ୍ୱର,୩୦ା୧୦(ବ୍ୟୁରୋ):ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମଙ୍ଗଳବାର ଯୁକ୍ତରାଷ୍ଟ୍ର ଆମେରିକା(ୟୁଏସ୍ଏ)ର ବାଣିଜ୍ୟ ଦୂତ (କନ୍ସଲ୍ ଜେନେରାଲ୍) ଜୋଏଲ୍ ରେଫ୍ମ୍ୟାନ୍ ଲୋକସେବା ଭବନରେ ସୌଜନ୍ୟମୂଳକ ସାକ୍ଷାତ କରିଛନ୍ତି। ସାକ୍ଷାତ ସମୟରେ ରାଜ୍ୟର ଅର୍ଥନୀତି, ଦ୍ୱିପାକ୍ଷିକ ସମ୍ପର୍କ, ଗ୍ରାମୀଣ ଅର୍ଥନୀତି, କୃଷି ଏବଂ କୃଷକଙ୍କ ସାମାଜିକ ଅର୍ଥନୈତିକ ସ୍ଥିତି ସମ୍ପର୍କରେ ଆଲୋଚନା କରାଯାଇଥିଲା। ସେହିପରି ନିୟମିତ ବ୍ୟବଧାନରେ ଓଡ଼ିଶା ବିଭିନ୍ନ ପ୍ରକାରର ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଛି। ରାଜ୍ୟ ପ୍ରଶାସନ ଏହାର ସଫଳ ମୁକାବିଲା କରୁଥିବାରୁ କନ୍ସଲ୍ ଜେନେରାଲ ସରକାରଙ୍କୁ ପ୍ରଶଂସା କରିଥିଲେ। କନ୍ସଲ୍ ଜେନେରାଲ୍ ରେଫ୍ମ୍ୟାନ୍ ସମବାୟ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁଙ୍କ ସହିତ ସୌଜନ୍ୟମୂଳକ ସାକ୍ଷାତ କରିବା ସହ ବିଭିନ୍ନ ବିଷୟରେ ଆଲୋଚନା କରିଛନ୍ତି। ଏହି ସାକ୍ଷାତ ସମୟରେ ‘ମୋ କଲେଜ୍’ର ଉପଦେଷ୍ଟା ଆକାଶ ଦାସ ନାୟକ, ସୂଚନା ଓ ପ୍ରଯୁକ୍ତି ବିଦ୍ୟା ବିଭାଗର ଉପଦେଷ୍ଟା ଅନୁଭବ ପଟ୍ଟନାୟକ ଏବଂ ସ୍ବତନ୍ତ୍ର ଉନ୍ନୟନ ପରିଷଦର ଉପଦେଷ୍ଟା ସୁଜିତ୍ କୁମାର ପ୍ରମୁଖ ଉପସ୍ଥିତ ଥିଲେ। ସେହିଭଳି କନ୍ସଲ୍ ଜେନେରାଲ୍ କାର୍ଯ୍ୟାଳୟର ରାଜନୈତିକ ଓ ଅର୍ଥନୈତିକ ବିଶେଷଜ୍ଞ ଶିବ ପ୍ରସାଦ ତ୍ରିପାଠୀ ଓ କେ. ଶ୍ରୀମାଳି ମଧ୍ୟ ଉପସ୍ଥିତ ଥିଲେ। ପୂର୍ବାହ୍ନରେ କନ୍ସଲ୍ ଜେନେରାଲ ମିଲ୍କ ମନ୍ତ୍ର ଫାର୍ମ ହାଉସ ଗସ୍ତ କରିଥିଲେ। ସେଠାରେ ଗୋପାଳନ, ଦୁଗ୍ଧ ଓ ଦୁଗ୍ଧଜାତ ଦ୍ରବ୍ୟର ଉତ୍ପାଦନ/ପ୍ରକ୍ରିୟାକରଣ ବ୍ୟବସ୍ଥାକୁ ପ୍ରଶଂସା କରିଥିଲେ। ଜୋଏଲ କହିଥିଲେ ଯେ, ମିଲ୍କ ମନ୍ତ୍ର ଦ୍ୱାରା କରାଯାଇଥିବା ବ୍ୟବସ୍ଥା ପ୍ରଶଂସନୀୟ। ଏହା ଦ୍ୱାରା କୃଷକଙ୍କ ଅର୍ଥନୈତିକ ଉନ୍ନତି ହୋଇପାରିବ। ସେମାନେ ଅର୍ଥ ଉପାର୍ଜନ କରିବା ସହ ନିଜର ଆର୍ଥିକ ସ୍ଥିତି ଉନ୍ନତି କରିପାରିବେ। ଓଡ଼ିଶାର ଗ୍ରାମୀଣ ଅର୍ଥନୀତି ଆଗକୁ ଆହୁରି ବିକାଶ କରିବ ବୋଲି କନ୍ସଲ୍ ଜେନେରାଲ କହିଛନ୍ତି।
