ବୁଗୁଡ଼ା,୧୮।୧(ଡି.ଏନ.ଏ.): ଗ୍ରାମାଞ୍ଚଳରେ ଶ୍ରମିକଙ୍କୁ କାମ ଯୋଗାଇ ଦେବା ପାଇଁ ମହାତ୍ମା ଗାନ୍ଧୀ ନିଶ୍ଚିତ କର୍ମ ଯୋଗାଣ ଯୋଜନା (ଏମଜିଏନଆରଇଜିଏସ)ରେ ପ୍ରକଳ୍ପ ଚୟନ କରାଯାଇ ମଞ୍ଜୁର ହେବା ପରେ ଶ୍ରମିକ ପାଇଁ ଡିମାଣ୍ଡ ଦିଆଯାଉଛି ଏବଂ ଡିମାଣ୍ଡ ଦିଆଯିବା ପରେ ମଞ୍ଜୁରପ୍ରାପ୍ତ ପ୍ରକଳ୍ପଗୁଡିକରେ ଶ୍ରମିକ ନିୟୋଜିତ କରିବା ନିୟମ ରହିଛି। ତେବେ କିଛି ଜାଗାରେ ଶ୍ରମିକ ବଦଳରେ ମେଶିନ୍ ଲାଗୁଥିବା ବେଳେ କିଛି ସ୍ଥାନରେ ଡିମାଣ୍ଡ ନ ବାହାରୁଣୁ ମେଶିନ୍ ଲଗାଇ କାମ ଆରମ୍ଭ ପରେ ଡିମାଣ୍ଡ ବାହାର କରି ଭୂତ ଶ୍ରମିକ ନିୟୋଜନ ପାଇଁ ଯୋଜନା କରାଯାଉଥିବା ଅଭିଯୋଗ ହେଉଛି। ବୁଗୁଡ଼ା ବ୍ଲକ ଅନ୍ତର୍ଗତ ଭାମଶିଆଳି ପଞ୍ଚାୟତରେ ମନରେଗା ଯୋଜନାରେ ନାଥୁଲି ବନ୍ଧ ଓ ଶୁକୁଆଖାଇ ବନ୍ଧ ପୁନରୁଦ୍ଧାର ସହ ବାଉଁଶିଆଠାରୁ ନାଥୁଲି ଏବଂ ନାଥୁଲି ଠାରୁ ଆର.ଡି ରୋଡ ପର୍ଯ୍ୟନ୍ତ ଲିଡିଙ୍ଗ୍ ଚାନେଲ ନିର୍ମାଣ ପାଇଁ ପ୍ରକଳ୍ପ ମଞ୍ଜୁର ହୋଇଛି ଏବଂ ପ୍ରତ୍ୟେକ ପ୍ରକଳ୍ପ ପାଇଁ ୧୦ଲକ୍ଷ ଟଙ୍କା ଲେଖାଏଁ ମଞ୍ଜୁର ହୋଇଛି। ତେବେ ଏହି ପ୍ରକଳ୍ପ ପାଇଁ ମାଷ୍ଟର ରୋଲ ତଥା ଡିମାଣ୍ଡ ବାହାରି ନଥିଲେ ହେଁ ଏଠାରେ ରାତି ଅଧିଆ ମେସିନ୍ ଲଗାଇ କାମ କରାଯାଇଥିବାର ଭିଜୁଆଲ ବାହାର କରି ଗ୍ରାମବାସୀ ପ୍ରମାଣ ସହ ବୁଗୁଡ଼ା ବିଡ଼ିଓଙ୍କ ନିକଟରେ ଅଭିଯୋଗ କରିଛନ୍ତି। ବିଡ଼ିଓ ବାସୁଦେବ ନାୟକ ଏହାର ତଦନ୍ତ ନିର୍ଦ୍ଦେଶ ଦେଇଥିବା କହିଛନ୍ତି।
