ନୂଆଦିଲ୍ଲୀ,୬।୨: ପାକିସ୍ତାନର ପୂର୍ବତନ ରାଷ୍ଟ୍ରପତି ପରଭେଜ ମୁଶାରଫଙ୍କ ପରଲୋକ ଘଟିଛି। ମୁଶାରଫଙ୍କ ମୃତ୍ୟୁକୁ ନେଇ ଅନେକ ଭାରତୀୟ ନେତା ଦୁଃଖ ପ୍ରକାଶ କରିଥିଲେ। କଂଗ୍ରେସ ନେତା ଶଶି ଥରୁର ଟୁଇଟ୍ କରି ପରଭେଜ ମୁଶରଫଙ୍କୁ ଗୁଣଗାନ କରିଥିଲେ। ଏହାକୁ ନେଇ ଥରୁର ସୋସିଆଲ ମିଡିଆରେ ବିରୋଧର ସମ୍ମୁଖୀନ ହୋଇଥିଲେ। କେନ୍ଦ୍ର ମନ୍ତ୍ରୀ ଗଜେନ୍ଦ୍ର ସିଂ ଶେଖୱାତ ମଧ୍ୟ ଶଶି ଥରୁରଙ୍କ ଟୁଇଟ୍କୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି।
ଗଜେନ୍ଦ୍ର ଶେଖୱାତଙ୍କ ପ୍ରତିକ୍ରିୟାରେ ଶଶି ଥରୁର କହିଛନ୍ତି, ସେ (କେନ୍ଦ୍ର ମନ୍ତ୍ରୀ ଗଜେନ୍ଦ୍ର ସିଂ ଶେଖୱାଟ) ମୋତେ ଇତିହାସ ବିଷୟରେ ଶିକ୍ଷା ଦେବା ଆବଶ୍ୟକ ନାହିଁ। କାର୍ଗିଲ ଯୁଦ୍ଧର ୪ ବର୍ଷ ପରେ ଶାନ୍ତି ଫେରାଇ ଆଣିବା ପାଇଁ ପାକିସ୍ତାନ ସହ ଭାଜପା ସରକାର ଆଲୋଚନା କରିଥିଲେ। ୨୦୦୪ରେ ବାଜପେୟୀ-ମୁଶାରଫ ମଧ୍ୟ ହାତ ମିଳାଇ ଏକ ମିଳିତ ବିବୃତ୍ତି ପ୍ରଦାନ କରିଥିଲେ। ସେ (ମୁଶାରଫ) ଆମର ସବୁଠାରୁ ବଡ ଶତ୍ରୁ ଥିଲେ କିନ୍ତୁ ଏହା ପରେ ପ୍ରାୟ ୪ ବର୍ଷ ଧରି ସେ ଭାରତ ସହ ସମାଧାନ ପାଇଁ ଅନେକ ଚେଷ୍ଟା କରିଥିଲେ।
ଶଶି ଥରୁର ଆହୁରି କହିଛନ୍ତି, ଯେତେବେଳେ ଯଦି କେହି ମୃତ୍ୟୁବରଣ କରନ୍ତି, ଆମେ ତାଙ୍କ ବିଷୟରେ ସମସ୍ତ ଖରାପ ଏବଂ ଭଲ କଥା ମନେ ରଖିଥାଉ। ଏହାକୁ ଏକ ବିବାଦ କରିବା ଦର୍ଶାଉଛି ଯେ ଭାଜପାର ଅନ୍ୟ କୌଣସି ପ୍ରସଙ୍ଗ ନାହିଁ।
ସୂଚନାଯୋଗ୍ୟ, ଶଶି ଥରୁର ପରଭେଜ ମୁଶରଫଙ୍କ ମୃତ୍ୟୁକୁ ସମବେଦନା ଜଣାଇ କହିଛନ୍ତି, ଏକଦା ଭାରତର ଜଣେ ଶତ୍ରୁ ଥିବା ମୁଶାରଫ ୨୦୦୨-୨୦୦୭ ମଧ୍ୟରେ ଶାନ୍ତି ପାଇଁ ପ୍ରକୃତ ଶକ୍ତି ହୋଇପାରିଥିଲେ। ଶଶି ଥରୁରଙ୍କ ଏହି ବିବୃତ୍ତି ସମ୍ପର୍କରେ ଭାଜପା ଶଶି ଥରୁରଙ୍କୁ ନିନ୍ଦା କରିଛି।
