ଡେରାଡୁନ,୨୦।୫: ଗେରୁଆ ବସ୍ତ୍ରପିନ୍ଧି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେଦାରନାଥର ଯେଉଁ ଗୁମ୍ଫାରେ ଧ୍ୟାନ କରୁଥିଲେ ତାହା ଏବେ ବେଶ୍ ଚର୍ଚ୍ଚିତ। ଶନିବାର ଏହି ଫଟୋଟି ସୋସିଆଲ ମିଡିଆରେ ଚର୍ଚ୍ଚାର କେନ୍ଦ୍ର ବିନ୍ଦୁ ପାଲଟିଥିଲା। ହେଲେ ଏହି ଗୁମ୍ଫାକୁ ଲାଗି ରହିଥିବା ଆଉ ଗୋଟିଏ ଗୁମ୍ଫା ଏବେ ସାଧାରଣ ଲୋକଙ୍କ ପାଇଁ ଖୋଲି ଦିଆଯାଇଥିବା ସୂଚନା ମିଳିଛି। ଯେଉଁଥିରେ ଶୌଚାଗାର ସଂଲଗ୍ନ ହୋଇ ରହିଛି। ଗରଓ୍ବାଲ ମଣ୍ଡଲ ବିକାଶ ନିଗମ(ଗିଏମ୍ଭିଏନ୍) ଓ୍ବେବସାଇଟ୍ ମାଧ୍ୟମରେ ଏହାକୁ ବୁକ୍ କରାଯାଇ ପାରିବ। ଗୋଟିଏ ରାତି ପାଇଁ ଏହାର ଭଡା ରଖାଯାଇଛି ୯୯୦ ଟଙ୍କା। ସୂଚନାଯୋଗ୍ୟ, ଏହା ପ୍ରାୟ ୧.୫ କିଲୋମିଟର ପାହାଡ଼ ଉପରେ ଅବସ୍ଥିତ ଥିବା ବେଳେ ଏହି ଗୁମ୍ଫାରେ ରହିଛି ଏକ ଛୋଟ ଝରକା। ଯାହା ମଧ୍ୟ ଦେଇ କେଦାରନାଥ ମନ୍ଦିର ଦୃଶ୍ୟମାନ ହେଉଛି। ପ୍ରଧାନମନ୍ତ୍ରୀ ମୋଦି ଶୁକ୍ରବାର ଏହି ଗୁମ୍ଫାରେ ୧୭ ଘଣ୍ଟା ସମୟ ଅତିବାହିତ କରିଥିଲେ।
