ଯାଜପୁର ଟାଉନ,୨୨।୧୧(ଡିଏନଏ): ଯାଜପୁର ମୁଖ୍ୟ ଚିକିତ୍ସାଳୟରେ ମହିଳା ଓ ଶିଶୁଙ୍କ ପାଇଁ ରହିଥିବା ସ୍ବତନ୍ତ୍ର ଚିକିତ୍ସାଳୟ ପ୍ରବେଶଦ୍ୱାରରେ କେତେକ ଅଟୋ ନିୟମିତ ଭାବେ ପାର୍କିଂ କରିବା ଯୋଗୁ ରୋଗୀଙ୍କୁ ନେଇ ଆସୁଥିବା ଗାଡି ଏବଂ ଆମ୍ବୁଲାନ୍ସଗୁଡିକ ଅସୁବିଧାର ସମ୍ମୁଖୀନ ହେଉଛନ୍ତି। ଏହାର ପ୍ରବେଶ ଏବଂ ପ୍ରସ୍ଥାନ ଦ୍ୱାର ମଝିରେ ରହିଥିବା ସ୍ଥାନ ତଥା କାଓକ୍ୟାଚର ଉପରେ ୨ଟି ଅଟୋରିକ୍ସା ନିୟମିତଭାବେ ପାର୍କିଂ ହୋଇରହୁଛି। ମେଡିକାଲର ସିକ୍ୟୁରିଟି ଗାର୍ଡଙ୍କୁ ଅଟୋରିକ୍ସା ଦ୍ୱୟର ଚାଳକ ନାଲିଆଖି ଦେଖାଉଥିବା ଶୁଣିବାକୁ ମିଳୁଛି। କେବଳ ଏହି ସ୍ଥାନ ନୁହେଁ, କିଛି ଅଟୋ ଏହି ଚିକିତ୍ସାଳୟର କ୍ୟାମ୍ପସ ମଧ୍ୟରେ ପାର୍କିଂ ହେଉଥିବାବେଳେ ମେଡିକାଲ ଛକରୁ ମହିଳା କଲେଜ ଛକର ଏକମୁଖି ମାର୍ଗକୁ ଅଟୋରିକ୍ସାଗୁଡିକ ପାର୍କିଂ ପାଇଁ ବ୍ୟବହାର କରୁଛନ୍ତି। ମେଡିକାଲ ଗେଟ୍ ସମ୍ମୁଖରେ ରହିଥିବା ସ୍ଥାନରେ ଅଟୋ ପାର୍କିଂ ସହିତ ଗେଟ୍ ପାର୍ଶ୍ୱରେ କିଛି ବ୍ୟବସାୟ ପ୍ରତିଷ୍ଠାନ ଖୋଲିବା ଯୋଗୁ ମେଡିକାଲ ଭିତରୁ ବାଇକରେ ବାହାରକୁ ଆସୁଥିବା ଚାଳକ କୁସୁମା ଦିଗରୁ ଆସୁଥିବା ଗାଡିଗୁଡିକୁ ଭଲ ଭାବେ ଦେଖି ନ ପାରି ବେଳେ ବେଳେ ଦୁର୍ଘଟଣାର ସମ୍ମୁଖୀନ ହେଉଛନ୍ତି। ଜିଲା ପ୍ରଶାସନ ଏ ଦିଗରେ ଦୃଷ୍ଟି ଦେବାକୁ ଦାବି ହୋଇଛି।
