ହିନ୍ଦୁ ଧର୍ମରେ ତେତିଶ କୋଟି ଦେବଦେବୀଙ୍କ ପୂଜାର୍ଚ୍ଚନା ସାଙ୍ଗକୁ ଏହାର ଭିନ୍ନ ଭିନ୍ନ ମହତ୍ତ୍ୱ ମଧ୍ୟ ରହିଛି। ସେହିପରି ଧର୍ମ ଅନୁସାରେ ନବଗ୍ରହଙ୍କ ପୂଜା ମଧ୍ୟ କରାଯାଏ। ଏଥିରେ ରାହୁ ଓ କେତୁଙ୍କର ଥାଏ ଭିନ୍ନ ମହତ୍ତ୍ୱ। ପ୍ରତ୍ୟେକ ଗ୍ରହଙ୍କ ଭଳି ରାହୁ ଓ କେତୁ ମଧ୍ୟ ନିଜସ୍ବ ପ୍ରଭାବକୁ ମନୁଷ୍ୟ ଉପରେ ପକାଇଥାନ୍ତି। ତାମିଲନାଡୁରେ କେତୁଙ୍କୁ ସମର୍ପିତ ଏକ ମନ୍ଦିର ରହିଛି, ଯାହା କୀଜାପେରୁମପଲ୍ଲମ୍ ଗଁାରେ ଅବସ୍ଥିତ। ଏହି ମନ୍ଦିରକୁ ନାଗନାଥସ୍ବାମୀ ମନ୍ଦିର ବା କେତି ମନ୍ଦିର ବୋଲି କୁହାଯାଏ। ମନ୍ଦିରକୁ ନେଇ ରହିଛି ଏକ ରହସ୍ୟମୟ କାହାଣୀ। ଯଦିଓ ମନ୍ଦିରଟି କେତୁଙ୍କୁ ସମର୍ପିତ; କିନ୍ତୁ ଏହାର ପ୍ରମୁଖ ଭଗବାନ ଭୋଳାଶଙ୍କର। ତେଣୁ ମନ୍ଦିରକୁ ନାଗନାଥ ନାମରେ ଜଣାଯାଏ। କୁହାଯାଏ, ଏଠାକୁ ବହୁ ଦୂରଦୂରାନ୍ତରରୁ ଲୋକେ କେତୁଙ୍କ ଉପରେ କ୍ଷୀର ଢ଼ାଳିବାକୁ ଆସନ୍ତି। କିନ୍ତୁ କିଛି ଲୋକଙ୍କଦ୍ୱାରା ଢ଼ଳାଯାଇଥିବା କ୍ଷୀରର ରଙ୍ଗ ଧଳାରୁ ନୀଳ ରଙ୍ଗରେ ପରିଣତ ହୋଇଥାଏ। ମାନ୍ୟତା ରହିଛି, ଯେଉଁମାନଙ୍କ ଜାତକରେ କେତୁଙ୍କ କୁପ୍ରଭାବ ରହିଥାଏ, କେବଳ ସେମାନଙ୍କ ଦ୍ୱାରା ଢ଼ଳାଯାଇଥିବା କ୍ଷୀରର ରଙ୍ଗ ପରିିବର୍ତ୍ତିତ ହୋଇଥାଏ। ମନ୍ଦିରକୁ ନେଇ ଏକ ପୌରାଣିକ କାହାଣୀ ମଧ୍ୟ ରହିଛି। କୁହାଯାଏ, ଥରେ ଜଣେ ଋଷିଙ୍କ ଅଭିଶାପରୁ ମୁକ୍ତ ହେବାକୁ କେତୁ ମହାଦେବଙ୍କ ଆରାଧନା କରିଥିଲେ। ମହାଦେବ କେତୁଙ୍କ ଉପରେ ଖୁସି ହୋଇ କୌଣସି ଏକ ଶିବରାତ୍ରିରେ ଋଷିଙ୍କଠାରୁ ଶାପମୁକ୍ତ କରାଇଥିଲେ। ତେଣୁ କେତୁଙ୍କୁ ସମର୍ପିତ ମନ୍ଦିରରେ ମହାଦେବଙ୍କର ବିଶେଷତା ଅଧିକ ରହିଛି।
