ନୂଆଦିଲ୍ଲୀ,୧୭ା୮ (ପି.ଟି.): ଯୌନ ନିର୍ଯାତନା ଅଭିଯୋଗ ମାମଲାରେ ସମ୍ପୃକ୍ତ ଜଣେ ମେଜର ଜେନେରାଲଙ୍କୁ ସେନା ବହିଷ୍କାର କରିଛି। କୋର୍ଟ ମାର୍ଶାଲ ବେଳେ ସେ ଦୋଷୀସାବ୍ୟସ୍ତ ହେବାରୁ ତାଙ୍କୁ ବହିଷ୍କାର କରିବା ପ୍ରସ୍ତାବକୁ ସେନାଧ୍ୟକ୍ଷ ଜେନେରାଲ ବିପିନ ରାଓ୍ବତ୍ ଅନୁମୋଦନ କରିଥିଲେ। କାର୍ଯ୍ୟାନୁଷ୍ଠାନ ସମ୍ପର୍କରେ ଉକ୍ତ ମେଜର ଜେନେରାଲଙ୍କୁ ଜଣାଇଦିଆଯାଇଛି। ଦୁଇବର୍ଷ ତଳର ଏହି ମାମଲାରେ ଆର୍ମି ଜେନେରାଲ କୋର୍ଟ ମାର୍ଶାଲରେ ଉକ୍ତ ଅଧିକାରୀଙ୍କୁ ବହିଷ୍କାର କରିବା ପାଇଁ ଗତବର୍ଷ ଡିସେମ୍ବର ୨୩ରେ ସୁପାରିସ କରାଯାଇଥିଲା। ତେବେ କୋର୍ଟ ମାର୍ଶାଲ ବିଚାରର ନକଲ ମେଜର ଜେନେରାଲଙ୍କୁ ଦିଆଯାଇ ନ ଥିବାରୁ ବହିଷ୍କାର କରାଯିବା ବେଆଇନ ବୋଲି ତାଙ୍କ ଓକିଲ ଆନନ୍ଦ କୁମାର କହିଛନ୍ତି। ମେଜର ଜେନେରାଲ ଜଣକ ନାଗାଲାଣ୍ଡରେ ନିଯୁକ୍ତ ହୋଇଥିବାବେଳେ ୨୦୧୬ରେ କ୍ୟାପ୍ଟେନ ପାହ୍ୟାର ଜଣେ ମହିଳା ଅଧିକାରୀ ତାଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ଆଣିଥିଲେ।
