ଭୁବନେଶ୍ୱର, ୨୧।୧୦(କ୍ରୀଡ଼ା ପ୍ରତିନିଧି)- ଜାପାନରେ ହେବାକୁ ଯାଉଥିବା ରଗ୍ବୀ ବିଶ୍ୱକପକୁ ନିକଟରୁ ଦେଖିବା ପାଇଁ ଓଡ଼ିଶାର ପ୍ରତିଭା ସମ୍ପନ୍ନ ଖେଳାଳି ମନ୍ଦୁଇ ସଏଙ୍କ ପାଇଁ ସୁଯୋଗ ଆସିଛି। ଇଣ୍ଡିଆନ ରଗ୍ବୀ ୟୁନିୟନ ପକ୍ଷରୁ ଲକି ଡ୍ର ଜରିଆରେ ୮ (୪ ବାଳିକା, ୪ ବାଳକ) ରଗ୍ବୀ ପ୍ରତିଭା ଏବଂ ୨ ଜଣ ଚେୟାରପର୍ସନଙ୍କୁ ଜାପାନ ପଠାଇବାକୁ ମନୋନୟନ କରାଯାଇଛି। ଏହି ତାଲିକାରେ କେନ୍ଦ୍ରାପଡ଼ାର ମନ୍ଦୁଇ ସାମିଲ ଅଛନ୍ତି। ୪ ବାଳିକାଙ୍କ ମଧ୍ୟରେ ଓଡ଼ିଶାର ମନ୍ଦୁଇ, ବିହାରର ଗୁରିଆ କୁମାରୀ, ଜମ୍ମୁ କଶ୍ମୀରର ଜୁନାଇରା ଅମ୍ବର ଓ ତାମିଲନାଡ଼ୁର ଆର. ପ୍ରିୟା ସ୍ଥାନ ପାଇଛନ୍ତି। ମନୋନୀତ ରଗ୍ବୀ ପ୍ରତିଭାମାନେ ବିଶ୍ୱକପ ଦେଖିବା ସହ ଜାପାନ କିଡ୍ସ ରଗ୍ବୀ ସ୍ପିରିଟ୍ ଫେଷ୍ଟିଭାଲରେ ଅଂଶଗ୍ରହଣ କରିବେ। ୧୪ ବର୍ଷୀୟା ମନ୍ଦୁଇଙ୍କ ପ୍ରକୃତ ଘର ହେଉଛି ମୟୂରଭଞ୍ଜ ଜିଲା ମହୁଲଡିହା ନିକଟସ୍ଥ ପୋଖରିଆବାଡ଼ି ଗ୍ରାମରେ। ସେ ମାତ୍ର ୧ ବର୍ଷର ହୋଇଥିବାବେଳେ ପିତୃ ବିୟୋଗ ଘଟିଥିଲା। ପରେ ତାଙ୍କ ମା’, ୨ ବଡ଼ ଭଉଣୀ ଓ ବଡ଼ ଭାଇ କେନ୍ଦ୍ରାପଡ଼ା ଚାଲି ଆସିଥିଲେ। ୭ମ ଶ୍ରେଣୀରେ ପଢ଼ୁଥିବା ମନ୍ଦୁଇ ଆନ୍ତଃ ସ୍କୁଲ ମିଟ୍ରେ ଭାଗ ନେଇ ଆସୁଛନ୍ତି। ରାଜ୍ୟ ପକ୍ଷରୁ ଜାତୀୟ ସ୍ତରରେ ପ୍ରତିନିଧିତ୍ୱ କରିବା ତାଙ୍କର ଲକ୍ଷ୍ୟ। ଓଡ଼ିଶା ରଗ୍ବୀ ଫୁଟବଲ ଆସୋସିଏଶନ ସମ୍ପାଦକ ଉପେନ୍ଦ୍ର କୁମାର ମହାନ୍ତି ମନ୍ଦୁଇଙ୍କୁ ଶୁଭେଚ୍ଛା ଜଣାଇଛନ୍ତି।
