ବମ୍ବେ,୨୧।୧୧: ଦେଶର ଜଣାଶୁଣା ଉଦ୍ୟୋଗପତି ରତନ ଟାଟାଙ୍କ ସହ କାମ କରିବା ଅନେକଙ୍କ ପାଇଁ ଏକ ସ୍ବପ୍ନ ଥାଏ। କିନ୍ତୁ ଟାଟା ନିଜେ ଯଦି ଫୋନ୍ କରି ଚାକିରି ଅଫର୍ ଦେବ ତେବେ ତାହା ନିହାତି ସୌଭାଗ୍ୟର କଥା। ୨୭ ବର୍ଷୀୟ ଶାନ୍ତନୁ ନାଇଡୁଙ୍କୁ ଏଭଳି ଅଫର୍ ମିଳିଛି। ଫେସବୁକ୍ରେ ‘ହ୍ୟୁମାନ୍ ଅଫ୍ ବମ୍ବେ’ରେ ନିଜ ସଫଳତାର କାହାଣୀ ବଖାଣିଛନ୍ତି ଶାନ୍ତନୁ। ପାଞ୍ଚବର୍ଷ ପୂର୍ବେ ରାସ୍ତାରେ ବୁଲାକୁକୁରଙ୍କ ଦୁର୍ଘଟଣାରେ ମୃତ୍ୟୁ ହେଉଥିବା ଦେଖି ଶାନ୍ତନୁ ଅତ୍ୟନ୍ତ ଦୁଃଖିତ ଥିଲେ। ସେମାନଙ୍କ ପାଇଁ କିଛି କରିବାକୁ ସେ ଚିନ୍ତା କରିଥିଲେ। ଏଥିପାଇଁ ସେ ବୁଲା କୁକୁରଙ୍କ ବେକରେ ଏକ ରିଫ୍ଲେକ୍ଟର ଲଗାଇ ଥିଲେ। ଏହାଦ୍ୱାରା ଦ୍ରୁତ ଗତିରେ ଆସୁଥିବା ଗାଡି ଡ୍ରାଇଭର୍ଙ୍କୁ ରାସ୍ତାରେ କୁକର ଥିବା ଦୂରରୁ ଜଣାପଡିବ। ଶାନ୍ତୁନୁଙ୍କ ଏଭଳି କାମକୁ ଟାଟା ଗ୍ରୁପ୍ ଅଫ୍ କମ୍ପାନୀଜ୍ର ‘ନୁଜଲେଟର’ରେ ବେଶ୍ ପ୍ରଶଂସା କରାଯାଇଥିଲା। ଏହାପରେ ରତନ ଟାଟାଙ୍କୁ ଏକ ଚିଠି ଲେଖିଥିଲେ ଶାନ୍ତନୁ। ଦୁଇ ମାସ ପରେ ଏହାର ଉତ୍ତର ମିଳିଥିଲା। ରତନ ଟାଟା ନିଜେ ଶାନ୍ତନୁଙ୍କୁ ଭେଟିବାକୁ ଚାହୁଁଥିଲେ। ୨୦୧୪ରେ ପ୍ରଥମଥର ପାଇଁ ରତନ ଟାଟାଙ୍କୁ ମୁମ୍ବାଇରେ ସେ ଭେଟିଥିଲେ। ତାଙ୍କ କାର୍ଯ୍ୟର ପ୍ରଶଂସା କରିବା ସହ ଭବିଷ୍ୟତକୁ ବେଶ୍ କିଛି ପ୍ରଶ୍ନ ତାଙ୍କୁ ପଚାରିଥିଲେ ଟାଟା। ଏହାପରେ ଶାନ୍ତନୁ ମାଷ୍ଟର ଡିଗ୍ରୀ ପୂରା କରିବା ପାଇଁ ବିଦେଶ ପ୍ରଳାଇଥିଲେ। ଭାରତ ଫେରିବା ପରେଦିନେ ରତନ ଟାଟା ହଠାତ୍ ତାଙ୍କ ଫୋନ୍ କରି କହିଥିଲେ, ମୋତେ ଅଫିସରେ ବହୁତ କିଛି କାମ କରିବାର ଅଛି, ତୁମେ ମୋ ଆସିଷ୍ଟାଣ୍ଟ ହେବ କି? ବାସ୍ ଏତିକି ଶୁଣି ଶାନ୍ତନୁ ତୁରନ୍ତ ହଁ ମାରିଦେଇଥିଲେ। ଗତ ୧୮ ମାସ ହେବ ସେ ଟାଟା କମ୍ପାନୀରେ କାମ କରୁଛନ୍ତି।
