ପୁରୀ ଅଫିସ,୨୭ା୪: ରଥଖଳା ସମ୍ପୂର୍ଣ୍ଣ ପ୍ରସ୍ତୁତ ସରିଛି। ରଥକାଠ ବି ପଡ଼ିରହିିଛି। ହେଲେ ରଥଖଳାରେ ଦେଖାନାହାନ୍ତି ମହାରଣା ସେବକ କି ଭୋଇ ସେବକ। ଶୂନ୍ଶାନ୍ ହୋଇପଡ଼ିିଛି ରଥଖଳା। ମହାମାରୀ କରୋନା ହିଁ ରଥଖଳାରେ ଖେଳାଇଦେଇଛି ଏମିତି ନୀରବତା। ଅକ୍ଷୟ ତୃତୀୟା ପରଠାରୁ ଧୀରେ ଧୀରେ ଚଳଚଞ୍ଚଳ ହୋଇପଡ଼େ ରଥଖଳା। କିନ୍ତୁ ଏ ବର୍ଷ ଏଥିରେ ବ୍ୟତିକ୍ରମ ଦେଖିବାକୁ ମିଳିଛି। ଲକ୍ଡାଉନ କଟକଣା ଯୋଗୁ ମେ ୩ ତାରିଖ ପର୍ଯ୍ୟନ୍ତ ଅପେକ୍ଷା କରିଛି ଶ୍ରୀମନ୍ଦିର ପ୍ରଶାସନ। ରାଜ୍ୟ ସରକାରଙ୍କ ପରବର୍ତ୍ତୀ ନିର୍ଦ୍ଦେଶନାମା କ’ଣ ରହିବ ତାହା ଉପରେ ହିଁ ନିର୍ଭର କରୁଛି ତିନିରଥ ନିର୍ମାଣ।
ଜୁନ୍ ୨୩ ତାରିଖରେ ରଥଯାତ୍ରା। ଆଉ ମାସେ ୨୫ଦିନ ସମୟ ରହିଲା। ହେଲେ ଏ ପର୍ଯ୍ୟନ୍ତ ରଥ ନିର୍ମାଣ ହୋଇପାରିଲା ନାହିଁ। ରଥ ନିର୍ମାଣରେ ବାଧକ ସାଜିଛି କରୋନା କଟକଣା। ରଥଯାତ୍ରାର ଆଦ୍ୟ ପର୍ବ କୁହାଯାଉଥିବା ଅକ୍ଷୟ ତୃତୀୟାରେ ରଥ ନିର୍ମାଣର ଅନୁକୂଳ ହୋଇଥାଏ। ରବିବାର ଶ୍ରୀମନ୍ଦିର ପରିସରରେ ରଥ ନିର୍ମାଣର ଅନୁକୂଳ ସରିଛି। ମାତ୍ର ଲକ୍ଡାଉନ କଟକଣା ଥିବାରୁ ରଥଖଳାରେ ନିର୍ମାଣ ଆରମ୍ଭ ହେଉନାହିଁ। ପ୍ରତିବର୍ଷ ଅକ୍ଷୟତୃତୀୟା ପରେ ରଥଖଳାରେ ରଥ ତିଆରି ଆରମ୍ଭ ହୋଇଯାଏ। ଭୋଇ ସେବକଙ୍କ ସହଯୋଗରେ ମହାରଣା ସେବକ ପ୍ରଥମେ ତୁମ୍ବ ତିଆରି କରିଥାନ୍ତି। ଏହାପରେ ରଥ ନିର୍ମାଣ କାମ ଆଗେଇ ଥାଏ। କିନ୍ତୁ ଏଥର ଅନୁକୂଳ ପରେ ଖଁ। ଖଁ। ରଥଖଳା। ଏଥିରେ ନିୟୋଜିତ ସେବକମାନେ ବି ଉଦାସ ମନରେ ରହିଛନ୍ତି। ହେଲେ ଏଭଳି ସମୟରେ ସରକାରଙ୍କ ନିଷ୍ପତ୍ତିକୁ ନେଇ ସେମାନେ ନୀରବ ଅଛନ୍ତି। ସୂଚନାଥାଉ କି, ତିନିରଥରେ ପ୍ରାୟ ୮୦ ଜଣ ମହାରଣା ସେବକ, ସମାନ ସଂଖ୍ୟକ ଭୋଇ ସେବକ କାମ କରିଥାନ୍ତି। ସେହିପରି ରୂପକାର, ଚିତ୍ରକର ଆଦି ବିଭିନ୍ନ ସେବକ ରଥ ନିର୍ମାଣରେ ସାମିଲ ହୋଇଥାନ୍ତି।
